Qazaqstan Úkimeti men reseılik SBER kompanııalar toby arasynda jasalǵan memorandýmnyń tolyq mátini jarııalandy. Qujattyń ataýy: «Sıfrlyq transformasııa, sıfrlandyrýdyń platformalyq modeline jáne «Data-Driven Government» tujyrymdamasyna kóshý jónindegi jobalardy iske asyrý salasyndaǵy yntymaqtastyq týraly memorandýmǵa qol qoıý týraly».
Sıfrlyq platformalyq sheshimderdi qurýǵa arnalǵan tehnologııalary, tájirıbesi men quraldary bar SBER kompanııalar toby strategııalyq áriptes retinde qazaqstandyq baǵdarlamalyq qamtylymdy ázirleýshi – «BTS Digital» JShS-ny (Qazaqstan Respýblıkasy Úkimetiniń 40% úlesi bar ERG tobynyń enshiles kompanııasy) anyqtaldy.
Memlekettiń kepildigimen «Ulttyq aqparattyq tehnologııalar» AQ «Sberbankten» nesıe almaqshy. Qujatta nesıeni «Qaryz týraly kelisim» dep ataǵan.
«UAT» AQ men Sberbank JAQ arasynda oǵan qyzmet kórsetý boıynsha negizgi borysh pen paıyzdar somasyna Qazaqstan Respýblıkasynyń memlekettik kepildigimen «UAT» AQ paıdasyna kredıt jelisin usynýdy kózdeıtin Qaryz týraly kelisim jasasý. Kredıt jelisi Sberbank JAQ tarapyna barlyq qajetti qujattar ýaqtyly usynylǵan jaǵdaıda 2022 jyldyń birinshi toqsanynyń sońyna deıin bes júz mıllıon AQSh dollaryna deıingi mólsherdegi soma Reseı rýblimen beriletin bolady», delingen qujatta.
Memorandýmda nesıeniń qansha paıyzben beriletini kórsetilmegen.
Osy Memorandým sharttarynda GovTech platformasyn iske asyrý shartyn jáne GovTech platformasy qyzmetterin alý shartyn jasasý múmkindigin qamtamasyz etedi.
Memorandým iske asýy úshin taraptar 2021 jyldyń 1 jeltoqsanyna deıin ony iske asyrý jónindegi is-sharalar josparyn ázirlep, qol qoıýy kerek.
Aıta keteıik, 3 qyrkúıek kúni Shyǵys ekonomıkalyq forýmy barysynda QR Premer-Mınıstri Asqar Mamın men Sberbank basqarmasynyń tóraǵasy German Gref yntymaqtastyq týraly memorandýmǵa qol qoıdy. Qujatqa sáıkes reseılik kompanııa Qazaqstannyń memlekettik sektoryn sıfrlandyrý jónindegi jobalardy iske asyrýǵa qatysady.
Buǵan deıin Sberbanktiń 50%-dan astam aksııasy Reseı úkimeti baqylaıtyn Ulttyq ál-aýqat qoryna tıesili ekeni jazyldy.
