Aýyl sharýashylyǵy mınıstri Erbol Qarashókeev, Aqmola oblysynyń ákimi Ermek Marjyqpaev, Qostanaı oblysynyń ákimi Arhımed Muhambetov, Soltústik Qazaqstan oblysynyń ákimi Qumar Aqsaqalov baıandama jasady.
Bıyl aýyl sharýashylyǵy daqyldarynyń jalpy egis alańy 23 mln gektardy qurady, bul 2020 jylmen salystyrǵanda 322 myń gektarǵa artyq.
Dándi jáne dándi-burshaqty daqyldar 16,1 mln ga (onyń ishinde bıdaı – 12,9 mln ga), maıly daqyldar – 3,1 mln ga, kókónis-baqsha daqyldary men kartop – 473,8 myń ga, maqta – 109,7 myń ga, qant qyzylshasy – 21,7 myń ga, jem-shóp daqyldary – 3,2 mln ga jerge egildi. Dándi daqyldardy jınaý úrdisi aýa-raıynyń qolaısyzdyǵymen jáne sonyń saldarynan bıdaı ónimdiliginiń tómendeýimen kúrdelene tústi. Kanadada bıdaı jınaýdyń 34,5%-ǵa, Reseıde 15%-ǵa, AQSh-ta 7%-ǵa tómendeýi kútilýde.
Qazaqstanda dándi jáne maıly daqyldardyń jalpy kólemin 18 mln tonna deńgeıinde, onyń ishinde 16 mln tonna dándi jáne dándi-burshaqty daqyldardy jınaýdy qamtamasyz etý kózdelgen. Búgingi kúni egin jınaý jumystarynyń 95% oryndaldy. 9,5 s/ga ortasha ónimdilik kezinde 14,3 mln tonna astyq jáne shamamen 200 myń tonna maıly daqyldar bastyryldy.
«Bıylǵy qurǵaqshylyqtyń saldarynan bıdaı kólemi azaısa da, elimizdegi bıdaıǵa degen ishki qajettilik tolyq qamtamasyz etildi. 6-6,5 mln tonnaǵa jýyq bıdaıdy eksportqa shyǵarýǵa múmkindigimiz bar», dedi A. Mamın.
Jańa eginniń sapalyq kórsetkishteri aıtarlyqtaı ósti. Dánmańyzy 28%-dan asatyn joǵary sapaly «Hi-Pro» bıdaı kólemi jınalǵan astyqtyń jalpy kóleminiń 74%-na jetti (2020 jyly – 60%). Bul sanattaǵy bıdaı álemdik naryqta joǵary suranysqa ıe.
Úkimet basshysy forvardtyq satyp alý baǵdarlamasy aıasynda aýyl sharýashylyǵy óndirýshileriniń «Azyq-túlik kelisim shart korporasııasyna» astyq jetkizýdi qamtamasyz etýi qajet ekenin atap ótti.
Oblys ákimdikterine jáne Aýyl sharýashylyǵy mınıstrligine egin jınaýdy qysqa merzimde aıaqtaý, 2022 jylǵy eginge qajetti tuqym qaldyrýdy qamtamasyz etý tapsyryldy.
Indýstrııa jáne ınfraqurylymdyq damý mınıstrligine «QTJ» UK» AQ-men birlesip, aýyl sharýashylyǵy óndirýshilerin astyqty turaqty tasymaldaý úshin jyljymaly qurammen qamtamasyz etý sharalaryn qabyldaý tapsyryldy.
