«Sońǵy kezde mınıstrlik, oblys ákimdikteri tarapynan aýyldyq eldi mekenderge medısına mamandaryn tartýǵa birqatar jumystar atqarylýda. Mamandardy aýyldarǵa jumysqa jiberetin «Dıplommen aýylǵa» baǵdarlamasy jumys jasaýda. Jergilikti ákimdikterden kóterme járdemaqy berilýde. Soǵan qaramastan, oblystarda, sonyń ishinde shalǵaı aýdandarda dáriger mamandar áli de jetispeıdi. Mysaly, kez kelgen medısınalyq otalarda óte qajetti anestezıolog-reanımatolog, sol sııaqty ınfeksıonıst, travmatolog, pýlmanolog, endokrınolog sııaqty mamandar kóptegen aýdandarda jetispeıdi. COVID-19 sııaqty aýyr naýqastan jazylǵan adamdarǵa reabılıtolog qajet. Ol múldem joqtyń qasy. Olardy aıtpaǵanda, akýsher-gınekolog, hırýrg, ftızıator sııaqty mamandar da shalǵaı aýdandarda jetpeı jatyr», dedi S.Naqpaev.
Onyń aıtýynsha, alys aýdandarda osyndaı kadr jetispeýine baılanysty ózderine kelip túsken naýqastardy sanıtarlyq-avıasııa shaqyrtyp, oblys ortalyqtaryna jiberýdi jıiletken. Bunyń bárine bıýdjetten qarajat kerek. Bul Qazaqstan Respýblıkasynyń barlyq oblystaryna tán problema.
«Jaǵdaıdyń bulaısha ýshyǵýyna grant boıynsha oqyǵan medısınalyq joǵary oqý oryndarynyń keıbir túlekteriniń mindetti bólý ádisine baǵynbaı, ózderi bólingen bolashaq jumys oryndaryna barmaı qalýlary da sebebin tıgizýde. Sonymen qatar, medısınalyq joǵary oqý oryndary úshin bólinetin grant sany túsiniksiz sebeptermen 2020 jyly azaıyp ketken», dedi depýtat.
Osy aıtylǵandar aıasynda kelesi problemalardy sheshý suraldy:
- «Nur Otan» partııasynyń 2025 jylǵa deıingi saılaýaldy baǵdarlamasy Jol kartasynyń oryndalýyna sáıkes, kózdelip otyrǵan 2021 jyldan bastap medısınalyq joǵary oqý oryndaryna granttar sanyn ulǵaıtýdy utymdy paıdalanyp, kadr jetispeý máselesin sheshý;
- Grantpen oqyǵan túlekterdiń ózderiniń bolashaq jumys oryndaryna sebepsiz barmaı qalýlaryn toqtatý;
- Grant bólgende medısınalyq mamandar jetispeıtin aımaqtarǵa kvota sanyn kóbeıtý;
- Aýyldyq eldi mekenderdegi jalpy praktıka dárigerlerin biliktiligin arttyrý kýrstaryna jiberý arqyly aýyldyq jerge kerekti medısınalyq mamandyqtardy alýǵa múmkinshilik qarastyrý.
