Qala aýyz sýmen Shaǵalaly jáne Sergeevka sý qoımalary arqyly qamtamasyz etiledi. Shaǵalaly sý qoımasynan táýligine 15 myń tekshe metr, Sergeevka sý qoımasynan 20 myń tekshe metr sý alynady.
– Qazir Sergeevkadan tartylǵan sý qubyryna apattyń aldyn alý baǵytyndaǵy jóndeý jumystary júrgizilip jatyr, – deıdi qala ákiminiń orynbasary Baýyrjan Ernazarov. – Sol sebepti Jaılaý jáne Saryarqa shaǵyn aýdandaryna sý berý ýaqytsha toqtatyldy.
Ákim orynbasarynyń aıtýyna qaraǵanda, jumys aýqymyn tııanaqty aıaqtap shyǵý úshin keminde jarty aı kerek eken. Qala turǵyndaryn aýyz sýmen qamtamasyz etý úshin «Kókshetaý sý arnasy» kommýnaldyq kásiporny 48 myń tekshe metr mólsherinde sý qoryn jasaǵan. Bul sý qala turǵyndarynyń biraz ýaqyt kádesine jaramaq. Shaǵalaly sý qoımasynan alynatyn sý kólemi 46 myń tekshe metrge deıin ulǵaıtylǵan. Áıtse de, turǵyn úılerde sýdyń jetispeýshiligi baıqalyp otyr. Qa- lanyń soltústigindegi jáne shyǵysyndaǵy ónerkásip aýmaqtarynda ornalasqan birqatar kásiporyndy sýdan shekteý týraly sheshim qabyldanypty.
Sergeevka sý qoımasy – oblys ortalyǵynan 200 shaqyrym qashyqtyqta. Munshama úlken sý qubyrynyń ár bóliginde jóndeý jumystaryn júrgizý uzaq ýaqyt almaq. Ákimdik turǵyndar máseleniń mánisin jete túsinip, shydamdylyq tanytsa eken deıdi.
