Aıtýly jarystyń jekelegen saıysynda tórt jerlesimiz baq synaǵan edi. Alǵashqy aınalymda ekeýi jeńilis tapty. Dmıtrıı Popko aýstralııalyq Djon Mıllmannan utyldy – 6:3, 1:6, 4:6. Mıhaıl Kýkýshkın jasyl qurlyqtyń taǵy bir ókili Djeıms Dakvordqa jol berdi – 6:7, 1:6. 20 jastaǵy Tımofeı Skatov tusaýkeser kezdesýinde álemniń burynǵy 18-raketkasy, ıtalııalyq Andreas Seppıdi jeńip, shaǵyn sensasııa jasady. Alaıda ile-shala ol belarýstik Ilıa Ivshakoǵa ese jiberdi – 2:6, 6:3.
ATR reıtınginde 34-orynda turǵan elimizdiń birinshi raketkasy Aleksandr Býblık osy týrnırdegi sońǵy úmitimiz edi. Alǵashqy aınalymda ol bos boldy. Odan keıin otandasymyz Mıomır Kesmanovıchpen kezdesti. 22 jastaǵy Serbııanyń saıypqyrany bul kúnderi úzdikter tiziminde 60-satyǵa jaıǵasqan. Onyń ústine, Kesmanovıch birinshi kezeńde Ispanııanyń dańqty tennısshisi Fernando Verdaskony utyp, aıdy aspanǵa bir-aq shyǵarǵan bolatyn. Biraq bul básekede bizdiń jigittiń myqtylyǵy esh kúmán týǵyzǵan joq. Shırek fınalda Býblık Pıreneı túbeginen kelgen Karlos Tabernerdi tize búktirdi – 6:3, 6:4. Jartylaı fınalda ol Ońtústik Koreıanyń ókili Kvon Son Výmen sheberlik baıqasty. Qazirgi kezde álemniń 80-raketkasy atanyp otyrǵan koreıalyq oıynshy bıyl Rolan Garrostyń úshinshi kezeńine deıin jetken edi. Bul tartysta Vý Býblıkten basym tústi – 3:6, 7:5, 6:3.
Juptyq saıysta da jerlesterimizdiń joly bolmady. Andreı Golýbev pen Aleksandr Nedovesov Fransııa oıynshylary Bendjamın Bonzı men Romena Arneododan utylyp qaldy – 4:6, 6:4, 6:7.
Esterińizge sala keteıik, Astana Open týrnırinde esimderi joǵaryda atalǵan sportshylardan bólek, ıspanııalyq Fernando Verdasko, reseılik Aslan Karasev pen Evgenıı Donskoı, fransııalyq Benýa Per, serbııalyq Dýshan Laıovıch jáne chehııalyq Irjı Vesely syndy tanymal tennısshiler óner kórsetti.
