«Qazirgi kezde barlyq memleket úshin revaksınasııa máselesi ózekti bolyp tur. Qazaqstanda arnaıy jumys toby quryldy. Onyń quramyna jetekshi klınısıst-ǵalymdar, dárigerler men sanıtarlyq-epıdemıologııalyq qyzmet mamandary endi. Biz Dúnıejúzilik densaýlyq saqtaý uıymnan jáne halyqaralyq agenttikterden qajetti aqparatty aldyq. Qazirgi kezde barlyq tájirıbe jan-jaqty zerdelenip jatyr. Búginde naqty talap joq. О́ıtkeni COVID-19 – jańadan shyqqan vırýs», dedi Soı úkimettiń baspasóz qyzmetinde ótken onlaın brıfıngte.
Mınıstrdiń aıtýynsha, barlyq aqparat zerdelengennen keıin halyqty ımmýndaý jónindegi komıssııa tıisti sheshim shyǵarady.
«Jaqyn arada sarapshylar toby óz qorytyndysyn shyǵarady. Jalpy, otandyq medısına salasy daıyn. Sheshim shyǵarylǵannan keıin tolyqqandy jumys isteı alamyz», dep atap kórsetti Soı.
Aıta keteri, tamyzdyń basynda densaýlyq saqtaý mınıstri vaksınany qaıta saldyrý merzimi týraly aıtqan bolatyn. Onyń sózine qaraǵanda, Qazaqstanda halyqtyń basym bóligi maýsym-shilde aılarynda ekpe saldyrdy. Sol sebepti ázirshe antıdenelerdiń deńgeıi áli joǵary bolyp tur. Al revaksınalaýdy 9 aıdan keıin jasaýǵa bolady. Degenmen ekpeni aqpan aıynda salǵan adamdar da bar.
«Máselen aqpan aıynda alǵashqy bolyp vaksına saldyrǵan adamdarǵa qazan aıyna qaraı ekpeni qaıta salý qajet. Onyń ýaqyty shamamen 1 qazan», dedi Soı otyrystardyń birinde.
Qazaqstan revaksınalaý tártibin pysyqtap alǵannan keıin Dúnıejúzilik densaýlyq saqtaý uıymymen konsýltasııa júrgizedi. Sodan keıin ǵana vaksınany qaıta salý sharalary bastalady.
