Qanysh Sátbaev atyndaǵy Qazaq ulttyq ǵylymı-tehnıkalyq ýnıversıteti - Satbayev University koronavırýsqa qarsy vaksına almaǵan stýdentterge kúndizgi oqý túrine qatysýǵa tyıym saldy. Buıryq 1 qazannan bastap kúshine enedi.
Bul týraly ýnıversıtet stýdentteri informburo.kz agenttigine habarlaǵan.
Satbayev University osyndaı buıryq shyǵarǵanyn rastady.
«Bul bizdiń ýnıversıtettiń stýdentteri men oqytýshylarynyń arasynda ujymdyq ımmýnıtet qalyptastyrý úshin jasalyp otyr. О́kinishke qaraı, bizde koronavırýs juqtyrý faktileri tirkeldi. Búgingi kúnge deıin 12 jaǵdaı anyqtalǵan, olar emdelip úlgerdi. Jańa derek joq», dedi ýnıversıtettiń áleýmettik-mádenı damý jónindegi prorektory Mansýr Álimhanov.
Prorektor ýnıversıtettiń stýdentteri men oqytýshylarynyń qaýipsizdigi úshin barlyǵy jasalyp jatqanyn atap ótti. Ýnıversıtette 10 myńnan astam stýdent bar, onyń ishinde 5500-den astamy vaksına alǵan, bul ekpe alýǵa tıis quramnyń 62%-n quraıdy. 3600-ge jýyq stýdent vaksına almady. 2000 stýdent ekpeden bosatylǵan. Onyń 1142-inde medısınalyq sebep bar, 174-i koronavırýspen aýyryp jazylǵan, 1781-i kámeletke tolmaǵan. Professorlyq-oqytýshylyq quramnyń 80%-ǵa jýyǵy vaksına saldyrǵan, shamamen 18%-y medısınalyq sebeppen bosatylǵan.
«Bizdiń basty mindetimiz - basqa stýdentterdiń qaýipsizdigi. Stýdentter adam quqyqtarynyń buzylýy jáne t.b. týraly aıtady, túsinemin. Alaıda adam quqyǵy basqa adamdardyń quqyǵy buzylǵan jerde aıaqtalady. Eger siz ekpe almaǵan bolsańyz, aýyryp qalsańyz, shekteý sharalaryn taǵy da qatańdataýǵa májbúr bolamyz. Qudaı saqtasyn, árıne. Biz tyıym salyp jatqan joqpyz, aldyn alý jumystaryn júrgizip jatyrmyz», dedi ol.
Prorektor ekpe almaǵan stýdentterdiń onlaın bilim alýǵa kóshetinin aıtty.
