Oblystyq densaýlyq saqtaý basqarmasy basshysynyń orynbasary Anjela Beksultanovanyń aıtýynsha, Qostanaıǵa taıaý kúnderi balalar men júkti áıelderge arnalǵan Phizer vaksınasy keledi. Artynsha Germanııadan nemis vaksınasy da jetip qalýy múmkin. Sonymen qatar osy vaksınalardy saqtaıtyn arnaıy tońazytqysh qurylǵylar da ákelinedi.
– Vaksına men tońazytqysh qurylǵylar bizdiń arnaıy medısınalyq qamtý ortalyǵyna kelip túsedi. Phizer vaksınasy mınýs 60-tan 90 gradýsqa deıingi temperatýrada saqtalynýǵa tıis. Qazir osy vaksınany egýge qatysatyn medısına qyzmetkerlerin oqytý semınarlary men trenıngter ótip jatyr. Biz bul vaksınalardy alǵan soń, temperatýralyq rejimdi saqtaı otyryp, oblystyń barlyq óńirindegi ekpe pýnktterine taratatyn bolamyz, – dedi A.Beksultanova.
Qostanaı oblysy «sary» aımaqqa kóship, indettiń taralý qarqyny sál báseńdegendeı boldy. О́ńirlik jedel shtab 27 qyrkúıekte oblystyń 102 turǵyny Covid-19 juqtyrǵanyn málimdedi. Esesine, ekpe alǵandar kún sanap eselenip keledi. Bul jaǵynan turǵyndarynyń 70 paıyzdan astamy vaksına qabyldaǵan Qarabalyq, B.Maılın, Altynsarın jáne Uzynkól aýdandary kósh bastap keledi.
Oblystyq densaýlyq saqtaý basqarmasy ókilderiniń aıtýynsha, aımaqta koronavırýspen aýyrǵan 48 júkti áıel tirkelgen. Bir áıel aýyr jaǵdaıda jatyr.
Qostanaı oblysy
