Foto: Aqorda
«Jasandy ıntellektiniń bir ereksheligi – kapıtal da, tehnologııa da kóshbasshylardyń qolyna shoǵyrlanady. Ýaqtyly ári batyl sheshim qabyldamasa, erteń «tehnologııalyq alshaqtyqty» qysqartý qıynǵa soǵady. Bul – Qazaqstan úshin alańdatarlyq ahýal. Qazirgi jaǵdaıdy egjeı-tegjeıli saralap, naqty ıntellektýaldyq ónimder jasaýǵa qabiletimiz qanshalyqty jetetinin anyq túsiný kerek. Elimiz klassıkalyq «Orta tabys daǵdarysyna» tap boldy degen sarapshylardyń pikirimen kelispeske amal joq. Mundaı kezde tabıǵı resýrstar men arzan jumys kúshi sekildi dástúrli resýrstar sarqyla bastaıdy, al ekonomıkalyq ósimge serpin beretin jańa salalar tıisti deńgeıde damymaıdy nemese iske qosylmaıdy. Ekonomıkanyń turalaýyna jol bermeý úshin úlken sıfrlyq platformalar qurý qajet. Sol arqyly sıfrlyq ekonomıkaǵa jedel aýysý amalyn izdegen durys. Memlekettik derekterdiń biryńǵaı júıesi bolmasa, jasandy ıntellektiden paıda joq. Osy oraıda memlekettik servısterdi kózge kórinbeıtin, biraq óte tıimdi operasııalyq júıege transformasııalaý kerek. Sonda shamadan tys bıýrokratııalyq talaptardan qutylamyz. Qazirgi júıe boıynsha suranys jiberýden bastap sheshim qabyldaýǵa deıingi aralyqqa birneshe kún nemese birneshe apta ketedi. Negizi, atalǵan sıkl birneshe sekýndqa deıin qysqarýǵa tıis. Sol kezde eldegi kapıtal aınalymy jedeldeı túsedi», dedi Qasym-Jomart Toqaev.
Sondaı-aq Prezıdent jasandy ıntellekt salasyndaǵy negizgi memlekettik jobalarǵa toqtaldy. Dúnıejúzilik banktiń málimetinshe, sıfrlyq ekonomıkanyń álemdik IJО́-degi úlesi 15 paıyzdan asqan. Bul jahandyq básekeniń taýar naryǵynan derekqor men standarttar naryǵyna qaraı oıysqanyn anyq kórsetedi.
Sıfrlyq ekonomıka IJО́-ge qalaı áser etedi? Prezıdent usynystar engizýdi tapsyrdy
«Búgingi ózgeristerdiń áserin elimiz áli tolyq sezine qoıǵan joq. О́tken aıda Qazaqstan biryńǵaı kedendik rásimdeý platformasyna ótti. Endi deklarasııa toltyrý ýaqyty bir mınýttan aspaıdy, qujattardyń basym bóligi avtomatty túrde qaralady. Sonymen qatar Smart Cargo ulttyq logıstıka platformasy jasalyp jatyr. Ol 127 derek kózine tikeleı qosylady. Tuǵyrnama adal jumys isteıtin kompanııalarǵa shekaradan tez arada ótýge múmkindik beredi. Salyq salasynda da túbegeıli ózgerister oryn aldy. Salyqtyq ákimshilendirýdiń birtutas júıesi qujattardy óńdeý ýaqytyn bir saǵattan bir mınýtqa deıin qysqartyp, eki mıllıon salyq tóleýshiniń servısti paıdalanýyn jeńildetti. Smart Data Finance platformasynyń iske qosylýy – eleýli jetistikterdiń biri. Júıe mobıldi aýdarymdardan bastap ushaqpen saparlaýǵa deıingi áreketterdiń bárin qamtıtyn 78 derekkózden analıtıkalyq málimet jınaıdy. Bıýdjetke onlaın-monıtorıng jasaý júzdegen mıllıard teńge táýekeli bar tólemderdiń aldyn alady. Ulttyq taýarlar katalogyna 23 mıllıonnan astam ónim túri engizildi. Osy arqyly memlekettik satyp alýlardyń boljamdyq-taldamalyq modeli jasalyp, jyl saıyn 200 mıllıard teńgeden astam qarjyny únemdeýge bolady», dedi Memleket basshysy.
