Parlament • 30 Qyrkúıek, 2021

Nurtóre Júsip jýrnalıst mártebesi týraly zań qabyldaýdy usyndy

351 ret kórsetildi

QR Parlament Senatynyń otyrysynda depýtat Nurtóre Júsip Jýrnalıst mártebesi týraly arnaıy zań qabyldaýdy usynyp, Premer-Mınıstrdiń atyna depýtattyq saýal joldady, dep habarlaıdy Egemen.kz.

«Elimizdegi BAQ týraly zańda jáne Eńbek kodeksinde jýrnalısterdiń mártebesi men kepildikteri týraly eshqandaı bap joq. Anyǵyraq aıtsaq, BAQ týraly zańnyń 20-babyndaǵy 10 quqyǵy men 21-babyndaǵy 5 mindeti ǵana jazylǵan. Eńbek kodeksinde mártebe jóninde bir aýyz sóz, tipti jýrnalısterdiń eńbek etý quqyqtary degen bólim de joq», dedi depýtat.

Onyń sózine qaraǵanda, aqparatqa qoljetimdilik salasynda jeke retteýdi qajet etetin máseleler barshylyq.

«Keıbir sheneýnikter tótenshe jaǵdaı kezderinde jýrnalısterdiń suraǵyna kásibı deńgeıde jaýap berýge daıyn bolmaı jatady. Kásibı qyzmetin atqaryp júrgen tilshige kedergi keltirý – halyqty memlekettik aqparat alý múmkindiginen aıyrý degen sóz. Kórshimiz Reseıdegi jaǵdaı múlde basqasha. Jýrnalısterdiń kásibı mindetine kedergi keltirgender, jýrnalısterge shabýyl jasaǵandar 6 jylǵa deıin túrmege qamalatyn arnaıy bap ta engizilgen», dedi ol.

Sondaı-aq, Senat ókili eldik pen memlekettilik isine tikeleı qyzmet etip otyrǵan jýrnalısterge polısııa ókilderine jasalǵandaı jaǵdaı nege jasalmaıtynyn surady.

«Pandemııa tusynda 200-ge tarta jýrnalıst pen jazýshy ómirden ótti. AQSh-ta jýrnalısterdiń jalaqysy jylyna 28 myńnan 75 myń dollarǵa deıingi aralyqta. Al bizde bir jylda tabatyny – 3-4 myń dollar shamasynda ǵana», degen senator Túrkııa, Ázerbaıjan sııaqty elderdiń de bul iste bizden kósh ilgeri ketkenin atady.

«Qurmetti Asqar Uzaqbaıuly! Otandyq mass-medıa Halyq únine qulaq asatyn memleket tujyrymdamasynyń pármendi quraly bolýy tıis. Jýrnalsıterge sot, prokýratýra, ishki ister, advokat, notarıýs sııaqty naqty mártebe beretin kez keldi. Aqparat salasyn damytýdyń 2021-2025 jyldarǵa arnalǵan Ulttyq josparyn jańadan jasaý qajet. BAQ-tyń yqpalynsyz qoǵamdy demokratııalandyrý múmkin emes. Sondyqtan jýrnalısterdi arnaıy áleýmettik mártebe arqyly qoldaýdy usynamyz. Ol úshin Jýrnalıst mártebesi týraly arnaıy zań qabyldaý qajet dep oılaımyn», dedi Nurtóre Júsip.

Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar