Halyq úshin árdaıym aıtary bar aıbarly aqynnyń tekten-tek dabyl qaqpaǵanyn uǵynyp, mejeli jerge qustaı ushtyq... Ol kezde búgingideı aldyn ala habar tarata qoıatyn baspasóz hatshysy nemese mekemelerde buqaramen baılanys jasaıtyn PR bólimderi joq. «Baspasóz máslıhaty» degen ataýdyń ózi tańsyq.
О́te kóńildi ekeniniń ózi túr-kelbetinen op-ońaı baıqala qoımaıtyn aqyn aǵamyz tilshiler úshin shyn máninde tosynsyı jasaıdy dep kim oılaǵan?!
– «Lenınshil jas», Qazaq radıosy, «Qazaq ádbıeti», «Jetisý»... «Halyq keńesi», «Almaty aqshamy»... dep árqaısymyzdyń aıtqanymyzdy qaıtalaı, qolymyzdy qysyp amandasqan Muhtar Shahanov «Redaktorlaryńa jeke ózim telefon shalyp, senderdi shuǵyl shaqyrtýymnyń sebebi, sanaýly mınýttardan soń osynda qazaqtyń tuńǵysh ǵaryshkeri Toqtar Áýbákirov keledi», – dep syr ashty.
Tóbemiz kókke jetkendeı qýandyq. О́ıtkeni ol kezde ǵaryshtan oralǵan Toqtar Áýbákirovpen júzdesý árbir tilshiniń armany bolatyn, amal qansha, Keńes Odaǵynyń eń sońǵy №72 ǵaryshkeri, Keńes Odaǵynyń Batyry, KSRO-nyń eńbek sińirgen synaqshy-ushqyshy alys ta aýyr sapardan keıingi ótetin ońaltý em-domyna sáıkes Máskeýde júrgen. Bir sózben aıtqanda, kúlli ómiri onsyz da «qupııalyqtan» quralǵan Batyrdyń joly Almatyǵa qashan túsetini týraly aqparat joqtyń qasy-tyn...
Aqyn bárimizge «Qosh keldińder-di...» aıtyp úlgergenshe, ishki esikti aıqara ashyp, Batyrdyń ózi de kirip keldi. Búgingi pikirler men talaptar ólshemimen bezbendesek, bul shyn máninde «Jalyn» almanaǵynda tuńǵysh ǵaryshkermen ótken Qazaqstandaǵy tuńǵysh baspasóz máslıhaty der edim. Kınodaǵylardaı kózimiz úırene bastaǵan kádimgi naǵyz «Gollıvýdtyń juldyzyndaı» jaıdary Áýbákirov tilshilerdiń ár saýalyna asyqpaı, talmaı ári qazaq tilinde tamasha jaýap berdi-aı. Mektepti oryssha bitirgennen kúlli oqý-qyzmeti týǵan jerden tys ótken jas jigittiń qoıylǵan suraqtarǵa ana tilinde oılanyp, asyqpaı, uǵynyqty sóılep, jaýap berýi barshamyzdy tańǵaldyrdy.
Sodan... Araldan ushqan tuz borannyń tóńirekti tumshalap qana qoımaı, Pamır taýynyń ushar basyna qaraı jóńkilip jatqany, Ekibastuz GRES-iniń tútini shýdalanyp túý Novosibir asqany... Jerdiń ǵaryshtan domalaq «tiri» organızm sekildi «tynystaýy», sýynyń qaı jyly taýsylǵany beımálim Ámýdarııanyń geografııada kórsetilgendeı Aralǵa kelip quımaıtyny... Kaspıı men Aral teńizderiniń jerasty baılanysy týraly ǵalymdar boljamy... ǵarysh keńistigine engende jáne shyqqanda adam denesiniń qandaı kúı keshetini sııaqty... basqa da qyzyqty áńgimeler shekteýsiz shertildi. Ǵaryshker qandaı saýal qoıylsa da, tosylmaı jaýap berdi.
Qazaqstan Respýblıkasy Jastar isteri jónindegi komıtettiń tóraǵasy Imanǵalı Tasmaǵambetovtiń: «Jigitter, Toqtar Ońǵarbaıulymen mańyzdy mekemede ótetin mańyzdy kezdesýge bara jatyrmyz», degen ısharasynan keıin ǵana tuńǵysh qazaq ǵaryshkermen Shahanov ofısindegi ótken jýrnalısterdiń mazmundy máslıhaty máresine jetti.
Túregep turyp, tizerlep otyryp, júreleı júgirip, baıyz tappaı, árbir qas-qaǵym sátti taspaǵa múlt jibermeı túsirgen ataqty fotojýrnalıst Nurmanbet Qızatuly aǵamyzdyń bul sýretiniń osyndaı bir tarıhy bar!
Sodan beri de otyz jylǵa taıaý ýaqyt zyrǵyp ótipti...
