Keıingi aılarda Qazaqstannyń syrtqy saıası belsendiligi edáýir artty. Prezıdent Qasym-Jomart Toqaev ekijaqty jáne kópjaqty formatta ótken birqatar iri jıynǵa, sonyń ishinde Túrikmenstandaǵy Ortalyq Azııa memleketteri basshylarynyń konsýltatıvti kezdesýine, Tájikstandaǵy UQShU men ShYU sammıtterine qatysty, Koreıa Respýblıkasyna memlekettik saparmen jáne Reseı Federasııasyna jumys saparymen bardy. Sonymen qatar Dýshanbede Iran Prezıdentimen jáne Pákistannyń Premer-mınıstrimen jeke-jeke kezdesýler ótkizdi.
Qasym-Jomart Toqaev UQShU-nyń beıresmı sammıtinde, Shyǵys ekonomıkalyq forýmynda jáne Qazaqstan men Reseı arasyndaǵy О́ńiraralyq yntymaqtastyq forýmynda beınebaılanys rejıminde sóz sóıledi.
21-28 qyrkúıek aralyǵynda Memleket basshysy BUU Bas Assambleıasynyń 76-sessııasy aıasynda ótken tórt birdeı is-sharaǵa – Jalpy saıası debattarǵa, BUU-nyń Azyq-túlik júıeleri jónindegi sammıtine, COVID-19 pandemııasy jónindegi jahandyq sammıtke jáne Iаdrolyq qarýdy tolyq joıý jolyndaǵy Halyqaralyq kúres kúnine arnalǵan joǵary deńgeıdegi plenarlyq otyrystarǵa qatysty.
Eki aıdyń ishinde Qasym-Jomart Toqaev Reseı, Fransııa, Belarýs, О́zbekstan, Saýd Arabııasy memleketteriniń prezıdentterimen jáne Eýropalyq odaq basshysymen telefon arqyly sóılesti.
Sonymen qatar Qazaqstan astanasy asa joǵary deńgeıdegi sheteldik delegasııalardy kóp qabyldaı bastady. Reseı Premer-mınıstri, Shveısarııa, Tájikstan, Túrkııa, Ázerbaıjan parlamentteriniń spıkerleri, Soltústik Makedonııanyń Syrtqy ister mınıstri, Saýd Arabııasy Koroldiginiń Investısııa mınıstri, Bashqurtstan Respýblıkasynyń basshysy, sondaı-aq halyqaralyq uıymdar men sheteldik iri kompanııalardyń ókilderi Qazaqstan Prezıdentiniń qabyldaýynda boldy.
Jalpy tamyz-qyrkúıek aılarynda Qasym-Jomart Toqaev álemdik deńgeıdegi 10 sammıt pen forýmǵa, onyń úsheýine oflaın, jeteýine onlaın rejımde qatysty. Eki memleketke saparmen bardy jáne jeti eldiń basshysymen telefon arqyly sóılesti. Sonymen qatar 12 sheteldik delegasııa qabyldady.
«Qazaqstan barlyq baǵyt boıynsha syrtqy saıası arenadaǵy yqpaldastyǵyn nyǵaıtyp keledi dep aıtýǵa bolady. Halyqaralyq baılanystardyń da geografııasy keńeıe tústi.
Qazirgi ahýal koronavırýs pandemııasyna deıingi kezeńge qaraǵanda halyqaralyq yntymaqtastyqtyń mańyzy búginde arta túskenin kórsetedi. Álemde jańa syn-tegeýrinder men qaýip-qaterler paıda boldy. Kóptegen aımaqta, onyń ishinde Ortalyq Azııa memleketterimen shekaralas óńirlerde jaǵdaı shıelenisip tur.
Ekonomıkalyq daǵdarys is júzinde barlyq qurlyqty qamtydy. Kóptegen el arasyndaǵy taýar aınalymynyń deńgeıi tómendep, kólik-logıstıkalyq baılanystar salasynda qıyndyqtar týyndady. Memleketter basshylarynyń saıası erik-jigerinsiz, álemniń qalypty ómirge oralýy ekitalaı.
Pandemııa saldaryn eńserý basty máselelerdiń biri bolyp qala beretini sózsiz. Saıasatkerler COVID-19 indetine qarsy vaksına jasaý jáne tasymaldaý jónindegi yntymaqtastyq máselelerin talqylaýda. Qazaqstan Prezıdenti osy ózekti problemaǵa qatysty pikirin BUU Bas Assambleıasynyń sessııasynda, sondaı-aq basqa da kópjaqty jáne ekijaqty is-sharalar barysynda aıtty.
Pandemııadan keıingi álemdegi jaǵdaıǵa qatysty másele joǵary deńgeıdegi kezdesýlerdiń kún tártibine jıi qoıyla bastady. Atap aıtqanda, saıası, saýda-ekonomıkalyq, ınvestısııalyq jáne tehnologııalyq yntymaqtastyqtyń jańa formalary talqylanyp júr. Sonymen qatar Ońtústik Koreıanyń, Reseıdiń, Eýropa odaǵynyń basshylarymen kelissózder kezinde sıfrlandyrý jáne jańa tehnologııalar salalaryndaǵy naqty jobalardy iske asyrýǵa mán berildi.
Halyqaralyq yntymaqtastyqtyń barlyq baǵyt boıynsha jandanýy pandemııadan keıingi kezeńdegi álemniń qalyptasýyna yqpal etýge tıis. Sol kezde shekaralar ashylyp, saıası, ekonomıkalyq, mádenı-gýmanıtarlyq jáne halyqaralyq baılanystar jańa deńgeıge kóteriledi», dep jazady baspasóz hatshysy.
Aldaǵy aılarda da Prezıdenttiń jumys kestesi óte tyǵyz bolmaq. Atap aıtqanda, jaqyn jáne alys shetelderge saparmen barý, birneshe sammıtke qatysý, sondaı-aq Qazaqstanǵa keletin joǵary laýazymdy sheteldik qonaqtarmen kezdesý jáne basqa da mańyzdy syrtqy saıası is-sharalar josparlanǵan.
