Rýhanııat • 06 Qazan, 2021

Qazaqstanda Álemdik jáne dástúrli dinder lıderleri Sezi Hatshylyǵynyń otyrysy ótti

121 ret kórsetildi

Nur-Sultan qalasynda Álemdik jáne dástúrli dinder lıderleri Sezi Hatshylyǵynyń HIH otyrysy ótti. Onda qatysýshylar kezekti Álemdik jáne dástúrli dinder lıderleriniń Sezine daıyndyq máselelerin talqylady, dep jazady Egemen.kz.

Otyrysty ashqan Qazaqstan Respýblıkasy Parlamenti Senatynyń Tóraǵasy – Álemdik jáne dástúrli dinder lıderleri Sezi Hatshylyǵynyń Basshysy Máýlen Áshimbaev Álemdik jáne dástúrli dinder lıderleriniń Sezi halyqaralyq kún tártibindegi biregeı bastama jáne jahandyq dinaralyq dıalogtyń naǵyz tıimdi tetigi ekenin atap ótti.

Sondaı-aq Sezd Hatshylyǵynyń Basshysy Qazaqstan Táýelsizdik jyldarynda beıbitshilik pen jalpyulttyq dıalogtyń ózindik modelin qalyptastyra alǵanyna nazar aýdardy. Ol «birlik áralýandyqta» qaǵıdatyna, eldiń bolashaǵy úshin ortaq jaýapkershilikke jáne etnosy men dinine qaramastan azamattardyń quqyǵyn qurmetteý men qamtamasyz etýge negizdelgen.

«Bıyl biz Qazaqstan Táýelsizdiginiń 30 jyldyǵyn atap ótemiz. Osy kezeńde beıbitshiliktiń, jalpyulttyq birlik pen konfessııaaralyq dıalogtyń ózindik modelin qalyptastyra aldyq. Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev negizin qalaǵan bul baǵdar óziniń tıimdiligi men ómirsheńdigin dáleldep úlgerdi. Qazirgi tańda el Prezıdenti Qasym-Jomart Toqaevtyń basshylyǵymen etnosaralyq jáne konfessııaaralyq kelisimdi qamtamasyz etý saıasaty jalǵasyp keledi. Biz Álemdik jáne dástúrli dinder lıderleriniń Sezi men Hatshylyq otyrysyn abyroı-bedel jınaý úshin ótkizbeımiz. Bul – qazaqstandyq damý jolynyń birtutas ajyramas bóligi», dedi Máýlen Áshimbaev.

Sonymen qatar Senat Spıkeri bıylǵy Hatshylyq otyrysy kúrdeli jaǵdaıda ótip jatqanyn aıtyp, oǵan koronavırýs pandemııasy men sońǵy jyldarda álemde basqa da jahandyq problemalardyń ýshyǵa túsýi sebep ekenin tilge tıek etti. Olardyń qatarynda geosaıası jáne geoekonomıkalyq faktorlar men jahandyq qaýipsizdik júıesiniń buzylýy saldarynan týyndaǵan halyqaralyq shıelenistiń kúsheıýi, qarý-jaraq jarysynyń údeýi jáne jahandyq ekologııalyq kún tártibindegi túıtkilder bar.

«Osyndaı jaǵdaıda rýhanı kóshbasshylardyń basty mindeti qundylyqtardyń durys júıesin qalyptastyrý jáne adamdardy beıbitshilik, adamgershilik, qoǵamdyq kelisim, ózara qoldaý sııaqty ıdeıalar aıasyna toptastyrý bolýy kerek ekeni sózsiz. Álemdik jáne dástúrli dinder lıderleri Seziniń negizgi maqsaty da – osy. Sondyqtan barshańyzǵa bizdiń Forýmǵa qatysyp, belsendi qoldaý kórsetkenińiz úshin shynaıy alǵys bildiremiz», dedi Sezd Hatshylyǵynyń Basshysy.

Sezd Hatshylyǵynyń otyrysyna 20 elden kelgen álemdik dinder men konfessııalardyń jáne halyqaralyq uıymdardyń ókili qatysty. Din lıderleri Qazaqstan óz ishinde ǵana emes, halyqaralyq deńgeıde de dinaralyq jáne konfessııaaralyq dıalog ornatýǵa basa mán berip, osy baǵytta mańyzdy jumys atqaryp kele jatqanyn aıryqsha atap ótti.

Naqty aıtqanda, BUU О́rkenıetter Alıansynyń Joǵary ókili Mıgel Anhel Moratınos turaqty jáne qaýipsiz álem qurý úshin dinniń qoǵamdaǵy rólin jáne halyqaralyq deńgeıdegi ózara is-qımyldy talqylaý turǵysynan Sezdiń mańyzy zor ekenin jetkizdi.

1

«Bul biregeı alań saıasatkerler, din lıderleri, halyqaralyq jáne óńirlik uıymdar jáne barlyq múddeli tarapqa álemdegi dinaralyq dıalog pen turaqty damýǵa qatysty problemalardy birlesip talqylaýǵa jaqsy múmkindik beredi. Sondyqtan BUU О́rkenıetter Alıansy aldaǵy VII Sezd jumysyna belsendi qatysady», dedi Mıgel Anhel Moratınos.

Hatshylyq otyrysynyń qorytyndysy boıynsha Álemdik jáne dástúrli dinder lıderleriniń VII Sezi ótetin oryn men merzim belgili boldy. Ol 2022 jylǵy 14-15 qyrkúıek kúnderi Nur-Sultan qalasynda ótedi. Atalǵan Forýmda pandemııadan keıingi kezeńde adamzattyń áleýmettik-rýhanı damýyndaǵy álemdik jáne dástúrli dinder lıderleriniń róli keńinen talqylanbaq.

«Otyrys sońynda Máýlen Áshimbaev búgingi kezdesý túrli mádenıetter men din ókilderiniń yntymaqtastyqta jáne beıbitshilikte ómir súrýge degen ortaq umtylysyn kezekti ret pash etkenin atap ótti. Sondaı-aq Hatshylyq Basshysy Álemdik jáne dástúrli dinder lıderleri Seziniń dástúrge aınalǵan osy umtylysy Forýmnyń ári qaraı da tabysty jumys isteýine negiz bolaryna senim bildirdi», dep habarlaıdy Senattyń baspasóz qyzmeti.

Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar