Atap aıtqanda, otyrysta «Táýelsiz Memleketter Dostastyǵyna qatysýshy memleketter Qarýly Kúshteriniń birlesken gýmanıtarlyq mınasyzdandyrý ınjenerlik bólimshesi týraly kelisimdi ratıfıkasııalaý týraly» zań jobasy qaralyp, qabyldandy.
TMD-ǵa qatysýshy memleketter Qarýly Kúshteriniń birlesken gýmanıtarlyq mınasyzdandyrý ınjenerlik bólimshesi týraly kelisim 2020 jylǵy 18 jeltoqsanda jasalǵan.
«Kelisimniń maqsaty – gýmanıtarlyq mınasyzdandyrý mindetin oryndaý úshin birlesken bólimsheni qurý, qoldaný, onyń mártebesin aıqyndaý. Birlesken bólimsheniń negizgi mindetteri – mına alańynda, nysandarda mına jarylý qaýpi bar zattardyń bolýyna tehnıkalyq barlaý, sondaı-aq olardy mınasyzdandyrý, jaýyngerlik is-qımyl bolǵan aýdandy mınadan jáne jarylý qaýpi bar zattan tazartý», dedi zań jobasy jóninde baıandama jasaǵan Qorǵanys mınıstriniń orynbasary Daryn Tuıaqov.
Vıse-mınıstrdiń aıtýynsha, gýmanıtarlyq mınasyzdandyrý operasııalaryna qatysý úshin ulttyq ınjenerlik bólimsheni jiberý týraly sheshimdi jiberýshi tarap óziniń ulttyq zańnamasyna sáıkes qabyldaıdy. Kelisimde birlesken bólimsheni TMD-ǵa qatysýshy memleket bolyp sanalmaıtyn el aýmaǵynda gýmanıtarlyq mınasyzdandyrý mindetterin oryndaýǵa tartý múmkindigi kózdelgen.
Memleketterdiń gýmanıtarlyq mınasyzdandyrý boıynsha ózara is-qımyly áskerı yntymaqtastyqtyń mańyzdy tetigi bolyp sanalady. Bul qujat mına alańdaryn tehnıkalyq barlaýmen jáne olardy mınadan tazartýmen aınalysatyn birlesken bólimshe qyzmetin qalyptastyrý, qoldaný jáne aıaqtaý tártibin anyqtaıdy.
Osy rette kelisimge BUU Qaýipsizdik Keńesiniń mandatyna sáıkes bizdiń elimiz TMD-ǵa múshe emes úshinshi memlekettiń aýmaǵyna ulttyq ınjenerlik bólimsheni jiberý týraly máseleni qaraıtyn eskertpemen qol qoıylǵanyn atap ótken jón.
Senator Nurjan Nursıpatovtyń aıtýynsha, memleketterdiń gýmanıtarlyq mınasyzdandyrý salasyndaǵy ózara is-qımyly áskerı yntymaqtastyqtaǵy asa mańyzdy aspekt bolyp sanalady.
«Qazaqstannyń TMD quramyna kirmeıtin memleketke gýmanıtarlyq mınasyzdandyrýdy atqarý úshin Ulttyq bólimsheni jiberýdi kózdeıtin eskertpe memleketimizdiń múddelerine jaýap beretinin atap ótken jón. Mıssııany halyqaralyq qoǵamdastyqtyń moıyndaýy Qazaqstan Respýblıkasy úshin syrtqy saıası táýekelderdi boldyrmaıdy. Kelisim aıqyn gýmanıtarlyq baǵytqa ıe, al ony iske asyrý TMD keńistigindegi qaýipsizdikti, Qazaqstan Qarýly Kúshteriniń mashyǵy men kásibı deńgeıin arttyrady», dedi depýtat.
Sonymen qatar otyrys barysynda depýtattar «Táýelsiz Memleketter Dostastyǵyna qatysýshy memleketter Qarýly Kúshteriniń birlesken (birikken) baılanys júıesi týraly kelisimdi ratıfıkasııalaý týraly» zań jobasyn qabyldady.
TMD-ǵa qatysýshy memleketter Qarýly Kúshteriniń birlesken baılanys júıesi týraly kelisim 2020 jylǵy 29 mamyrda jasaldy. Qujatta qarastyrylǵan negizgi mindetterge Qarýly Kúshterdi basqarý júıesinde jáne olardyń arasynda talap etiletin baılanys qyzmetterin usyný ári aqparattyń barlyq túrimen almasýdy qamtamasyz etý kiredi.
Sondaı-aq Táýelsiz Memleketter Dostastyǵy formatynda qurylǵan áskerı saladaǵy ózara is-qımyldyń birikken júıeleriniń jumys isteýin qamtamasyz etý kózdelgen. Budan bólek, baılanysqa, ortaq paıdalanylatyn ulttyq baılanys jelileri men arnaıy maqsattaǵy baılanys jelilerimen qajetti úılesimdilikke qoıylatyn talaptardyń oryndalýyn qamtamasyz etý qarastyrylǵan.
«О́kiletti organ óz memleketiniń zańnamasyna sáıkes, Birlesken baılanys júıesiniń jumys isteýin qamtamasyz etý maqsatynda óziniń baılanys jelisi resýrsyn paıdalana alady. Biryńǵaı tehnıkalyq tásil, qazirgi zamanǵy áskerı tehnıkamen, baılanys jabdyǵymen basym túrde jaraqtandyrý negizinde qurylatyn Birlesken baılanys júıesi memleketter Qarýly Kúshteriniń jaýyngerlik qabiletin arttyrady», dedi Daryn Tuıaqov.
Senator Nurjan Nursıpatovtyń sózine súıensek, kelisim Qazaqstan Respýblıkasynyń Konstıtýsııasyna, Qazaqstan Respýblıkasynyń zańnamasyna, Qazaqstan ratıfıkasııalaǵan halyqaralyq sharttarǵa jáne Qazaqstan qatysýshysy bolyp sanalatyn halyqaralyq uıymdardyń sheshimderine qaıshy kelmeıdi.
Senatorlar baılanys júıeleriniń kepildendirilgen jáne tıimdi jumys isteýin qamtamasyz etý jolynda kúsh biriktirý TMD-ǵa múshe memleketterdiń Qarýly Kúshterindegi basqarýdyń mańyzdy tetigi ekenin aıtty.
«Búgin qabyldanǵan eki zań Táýelsiz Memleketter Dostastyǵyna múshe elder arasyndaǵy qaýipsizdik salasyndaǵy yntymaqtastyqtyń jekelegen máselelerin retteýge baǵyttalǵan. Bul kelisimder TMD sheńberinde beıbitshilik pen qaýipsizdikti qamtamasyz etýge úlesin qosady dep senemiz», dedi Máýlen Áshimbaev.
