Memleket zeınetaqymen qamsyzdandyrýdy jetildirý boıynsha turaqty negizde sharalar qabyldaýda. Máselen, Eńbek jáne halyqty áleýmettik qorǵaý mınıstrligi baspasóz qyzmetiniń habarlaýynsha, 2021 jylǵy 1 qańtardan bastap yntymaqty zeınetaqynyń mólsheri 7%-ǵa, bazalyq zeınetaqynyń mólsheri 5%-ǵa ósti. 2018 jylǵy 1 shildeden bastap bazalyq zeınetaqy mólsheri zeınetaqy júıesine qatysý ótiline qaraı eń tómengi kúnkóris deńgeıiniń 54%-dan 100%-ǵa deıingi eńbek ótiline qaraı saralanyp belgilenedi. Qazirgi ýaqytta bazalyq zeınetaqynyń eń tómengi mólsheri 18,5 myń teńgeni, eń joǵary mólsheri – 39,3 myń teńgeni, al 2021 jylǵy 1 qyrkúıektegi jaǵdaı boıynsha ortasha mólsheri – 31,1 myń teńgeni quraıdy. 2021 jylǵy 1 qyrkúıektegi jaǵdaı boıynsha yntymaqty zeınetaqynyń ortasha mólsheri 68,8 myń teńgeni, eń joǵary mólsheri – 100,6 myń teńgeni, eń tómengi mólsheri 43,3 myń teńgeni quraıdy.
Sonymen qatar Nur Otan partııasynyń «О́zgeris joly: árkimge laıyqty ómir!» saılaýaldy baǵdarlamasy aıasynda bıyl Eńbek jáne halyqty áleýmettik qorǵaý mınıstrligi Aǵa býyn azamattarynyń jaǵdaıyn jaqsartý jónindegi 2025 jylǵa deıingi «Belsendi uzaq ómir súrý» is-sharalar josparyn bekitti. Jospardyń qabyldanýy egde jastaǵy azamattarǵa qoǵam ómiriniń túrli salalaryna qatysý múmkindigin keńeıtýge, sondaı-aq olardy sapaly memlekettik qoldaý sharalarymen qamtamasyz etýge múmkindik beredi. Jospardyń iske asyrylýyn baqylaýdy atalǵan vedomstvonyń jobalyq ofısi júzege asyrady.
«Josparǵa sáıkes elimizdiń barlyq óńirinde belsendi uzaq ómir súrý ortalyqtaryn ashý kózdelgen. Mundaı ortalyqtardyń qyzmeti egde jastaǵy belsendi azamattardyń sanyn kóbeıtýge, olardyń ómir súrý sapasyn, ál-aýqatyn, densaýlyǵyn jáne kóńil kúı jaǵdaıyn jaqsartýǵa múmkindik beredi. Qazirgi ýaqytta elimizdiń 10 óńirinde: Almaty qalasynyń barlyq aýdandarynda (9 ortalyq), Nur-Sultan jáne Shymkent qalalarynda, sondaı-aq Aqmola, Jambyl, Qaraǵandy, Qostanaı, Aqtóbe, Túrkistan, Soltústik Qazaqstan oblystarynda 21 ortalyq jumys isteıdi», dep habarlady mınıstrliktiń Áleýmettik kómek saıasatyn damytý departamentiniń dırektory Asqar Nııazov.
Sonymen qatar Tuńǵysh Prezıdent – Elbasynyń tapsyrmasy boıynsha «Qamqorlyq qory» korporatıvtik qory elimizdiń ár óńirinde kommýnaldyq memlekettik mekeme nysanynda ortalyqtar ashýdy josparlap otyr.
«Ortalyqtardy jabdyqtarmen jabdyqtaý úshin «Samuryq-Qazyna» UÁQ 510 mln teńge (árbir ortalyqqa 30 mln teńge), «Qamqorlyq qory» mamandardy oqytý úshin 85 mln teńge (árbir ortalyqqa 5 mln teńge) somasynda qarajat bóledi», dep tolyqtyrdy A.Nııazov.
Egde jastaǵy qazaqstandyqtardy áleýmettik qoldaýdyń taǵy bir mańyzdy baǵyty arnaýly áleýmettik qyzmetter kórsetý. Búgingi tańda 45 myńnan astam qart azamat AÁQ-men qamtyldy. Olarǵa 45 stasıonarlyq úlgidegi uıymda (medısınalyq-áleýmettik mekemelerde), 43 jartylaı stasıonarda (kúndizgi bólimsheler jáne ońaltý ortalyqtary), sondaı-aq 357 úıde áleýmettik kómek kórsetý bólimshesinde, memlekettik áleýmettik tapsyrys sheńberinde 136 ÚEU-da jáne MJÁ sheńberinde 4 jeke uıymda qyzmet kórsetiledi.
«Áleýmettik qyzmet kórsetý mekemeleri 8 qyzmet túrin usynady: áleýmettik-ekonomıkalyq, áleýmettik-quqyqtyq, áleýmettik-eńbek, áleýmettik-mádenı, áleýmettik-psıhologııalyq, áleýmettik-pedagogıkalyq, áleýmettik-medısınalyq qyzmetter. Áleýmettik qyzmetkerler aptasyna keminde 2 ret úıde áleýmettik kómek alatyn qart adamdarǵa barady jáne olarǵa týyndaǵan áleýmettik problemalaryn eńserýi úshin jaǵdaılardy qamtamasyz etýge jáne olarǵa basqa azamattarmen teń dárejede qoǵam ómirine qatysý múmkindikterin qurýǵa baǵyttalǵan qyzmetter keshenin kórsetedi», dedi A.Nııazov.
Jalpy, aǵymdaǵy jyldyń ishinde jergilikti bıýdjetterdiń múmkindikterin eskere otyryp, bıznestiń áleýmettik jaýapkershiligi aıasynda qart adamdardy áleýmettik qoldaýǵa 11,9 mlrd teńgeden astam qarajat baǵyttaldy (onyń ishinde jergilikti bıýdjetten – 11,5 mlrd teńge, tartylǵan qarajat esebinen – 0,5 mlrd teńge), onyń ishinde Uly Otan soǵysyndaǵy Jeńis kúnine birjolǵy materıaldyq kómekke – 6,4 mlrd teńge (shamamen 115,8 myń adam); azyq-túlik jıyntyǵyn usynýǵa – 145,5 mln teńge (31,6 myń adam); jeńildikpen dári-dármekpen qamtamasyz etýge – 46,6 mln teńge (4 myń adam); tis protezdeýge – 229 mln teńge (2,5 myń adam); sanatorlyq-kýrorttyq emdeýdi usynýǵa – 1 mlrd 247,8 mln teńge (24,1 myń adam); turǵyn úıdi jóndeýge – 39,9 mln teńge (517 adam); otynmen qamtamasyz etýge – 286,5 mln teńge (10,5 myń adam); jalpy paıdalanymdaǵy kólikte jeńildikpen jol júrýge – 878,0 mln teńge (8 myń adam); kómektiń basqa túrlerine – 2 mlrd 667,8 mln teńge (182,5 myń adam).
Qazaqstanda Qarttar kúnine oraılastyrylǵan aılyq bastalady. Oblystardyń, qalalar men aýdandardyń ákimderi, kásiporyndar men uıymdardyń basshylary aǵa býyn azamattaryn áleýmettik qoldaý jónindegi is-sharalardy, eńbek ujymdarynda kezdesýlerdi, ambýlatorııalyq-emhanalyq uıymdarda Ashyq esik kúnderin jáne basqa da sharalardy ótkizbek.
