Májilistiń jalpy otyrysynda Energııa únemdeý jáne energııa tıimdiligi máseleleri boıynsha zańnamalyq túzetýlerdi birinshi oqylymda talqylaý barysynda depýtattar Indýstrııa jáne ınfraqurylymdyq damý mınıstrliginiń Zań jobasynan Memlekettik energetıkalyq tizilim sýbektileriniń ýákiletti memlekettik organǵa sýdy tutyný men ysyrap etý derekterin usyný mindetin kózdeıtin normany alyp tastaý máselesin kóterdi.
Ázirleýshi tizilim sýbektileriniń sý tutyný kólemin jyl saıyn azaıtýdy qamtamasyz etý mindetin alyp tastaýdy usynady.
Depýtattardyń pikirinshe, bul normalardy qoldanystaǵy zańnamaǵa qaıtarý qajet.
Májilis spıkeri sý tapshylyǵyna alyp keletin klımattyq ózgerister jaǵdaıynda bul máseleniń ózektiligin atap ótti.
«Eger mınıstrliktiń usynysy qabyldansa, onda ishki sý tutyný júıesinen, basqasha aıtqanda, qalalyq sý arnasy júıesinen sýdy tutynatyn myńdaǵan ónerkásiptik kásiporyndar, kommersııalyq jáne bıýdjettik uıymdar baqylaýdan tys qalady. Bul degenimiz qalaı, sýdy utymdy paıdalaný kerek pe, joq pa degen suraq ashyq qalady. Buǵan jol berýge bolmaıdy. Sondyqtan zań jobasynda sý tutynýdy baqylaý júıesi qarastyrylýy tıis», dep atap ótti Nurlan Nyǵmatýlın.
Depýtattardyń sý tutynýdy baqylaýdyń qoldanystaǵy júıesin saqtaý týraly usynysyn qoldaı otyryp, Májilis Tóraǵasy jumys tobyna ekinshi oqylymǵa deıin bul máseleni zań jobasyn ázirleýshilermen pysyqtaýdy tapsyrdy.
Tutastaı alǵanda, zań jobasy jalpy ishki ónimniń energııa syıymdylyǵyn tómendetý boıynsha energııa únemdeý jáne energııa tıimdiligin arttyrý salasynda júrgizilip jatqan saıasattyń túpkilikti nátıjesine qol jetkizýge baǵyttalǵan.
