Dástúr jalǵastyǵy

Elimizde ańshylyq sharýashylyq jańa deńgeıge kóterilmek. Sonyń jarqyn bir dáleli – keshe Ulttyq akademııalyq kitaphanada respýblıkalyq aqparattyq-tanymdyq «Qansonar» jýrnalynyń tusaýkeser rásiminiń ótkizilýi. Bul basylymnyń jaryq kórýi ańshylyq dástúr jalǵastyǵynyń óris alýyna ózindik septigin tıgizedi dep kútilýde. Tusaýkeser rásiminde sóılegen só­zinde «Qansonar» ańshylardyń qo­ǵam­­dyq birlestikteri men ańshy­lyq sharýa­shy­­ly­ǵy sýbek­tile­ri­niń respýblıkalyq qaýym­dastyǵynyń tór­­aǵasy Oralbaı Ábdi­ká­rimov ańshylyq sharýa­shy­lyǵy týraly aqparat bere ketti. Tóraǵanyń aıtýynsha, 2012 jylǵy 29 qańtarda kúshine engen «Janýarlar dúnıesin qorǵaý, ósimin molaıtý jáne paıdalaný týraly» Zańnyń jańa redak­sııasyna sáıkes, eli­miz­diń ańshylyq jurt­shy­lyǵy men ańshy­lyq sharýa­shylyǵy sýbek­­tileriniń aldyna res­pýb­lı­kalyq qaýym­dastyq qurý mindeti qoıy­lyp jáne mem­leket tarapynan qaýym­dastyqqa janýar­lar dúnıesin qorǵaý, onyń ósimin molaıtý jáne paıdalaný jónindegi óz óki­lettikteriniń bir bóligi berilgen-di. «Osylaısha, ańshylyq sharýashylyǵyn basqarý jáne júrgizý máseleleri boıynsha memleket pen qoǵam arasyndaǵy áriptestik qatynastardy qalyptastyrýdyń qu­qyq­tyq negizderi jasaldy», dedi O.Ábdi­kárimov. «Qansonar» jýrnalynyń bas redaktory Saǵıdolla Kóshimbaevtyń sózine qaraǵanda, jýrnal toqsanyna 1 ret, al jy­lyna 4 ret memlekettik tilde jáne orys tilinde jaryq kóredi. Bolashaqta aǵylshyn tilinde shyǵarý josparlanyp otyr. Jýrnal qyzmetkerleri ańshylyq sharýashylyqtarynda zertteýler júrgi­zip, dástúrli ań aýlaýdy qoldaýǵa, elimiz ben shetelderdegi ańshylyq táji­rı­beler men týrlardy, brakonerlermen kúresti nasıhattaýǵa úles qosady. Jáne de Qazaqstannyń SI-AI-SI-ge kirip, álem­dik qoǵamdastyqtyń tolyq­qandy múshesi atanýyna, janýarlar men kemir­gishter arasynda zalaldy aýrýlardyń taramaýyna qolǵabys etý josparlanyp otyrǵany alǵa tartyldy. Sondaı-aq, ańshylyq qural-saımany, ańshy ıt­ter, jabaıy janýarlar týraly tanymdyq maǵ­lu­mattar berilip, kórkem bezendirilgen basylym stýdentter men mektep oqýshylary úshin de qy­zyqty etip jasalmaq. Budan basqa, elimizdiń kórikti jerleri kórsetilip, ulttyq park­ter men jan-janýarlar álemimen tanys­tyrý júzege asyrylady. Ásirese, ataqty jazýshylardyń ǵajap sátter jaıly jazbalary, ańshynyń ázil-qaljyńdary men osy taqyrypta jazatyn azamattardyń shyǵarmalaryn basý kózdelgen. Sonymen, «Qansonar» respýblıkalyq aqparattyq-tanymdyq jýrnaly ázirge 1 myń danamen jaryq kórýde. Alda jazylý arqyly taralady dep kútilýde. Jýrnalǵa 2014 jyldyń ekinshi jartysynan «Qazposhta» AQ arqyly 74728 ındeksi boıynsha jazylýǵa bolady. Asqar TURAPBAIULY, «Egemen Qazaqstan».