Qazaqstannyń birqatar óńirlerinde, ásirese, batys aımaqtarda qurylymy keýekti, máselen, áktas jáne ulýtas sııaqty beriktigi tómen tabıǵı materıaldar bar ekeni belgili. Keýekti materıaldardy qoldanǵan kezde tas ylǵaldy sińirip alyp, qysta qatqan kezde buzyla bastaıdy, ıaǵnı sıkldyq tońý-erý prosesi kezinde tez buzyla bastaıdy. Arnaıy tehnologııalarsyz mundaı materıaldy jol salasynda qoldanýǵa bolmaıdy.
Sol sebepten, jol mamandary qurylys materıaldaryn basqa aımaqtardan ákelýge májbúr. Al bul qurylys qunyna eleýli áser etedi.
Qazaqstan jol ǵylymı-zertteý ınstıtýtynyń ǵalymdary materıaldardyń turaqtylyǵyn arttyrýǵa múmkindik beretin arnaıy ızolıasııalyq qabat qurýdyń jolyn tapqanyn málimdedi.
«Osyndaı ǵylymı zertteýmen hımııa ǵylymdary mamandarymen birigip aınalysyp jatyrmyz. Osy ızolıasııalyq qabat jasaýdyń eki ádisin, ıaǵnı eki quramyn taptyq. Sol eki quram da alǵashqy zerthanalyq zertteýler kezinde oń nátıje berdi», dep atap ótti Teltaev.
Osy ádisti jartylaı óndiristik jaǵdaıda zertteý bastalyp, joldyń tájirıbelik ýchaskesin salý josparlanýda. Eger ınnovasııa óziniń tıimdiligin dáleldese, aldaǵy ýaqytta qoldanýǵa usynylady. Ǵalymdardyń aıtýynsha, tehnologııa únemdi, ony praktıkada, ásirese jergilikti mańyzy bar joldarda keńinen qoldanýǵa bolady.
