El úkimeti turǵyndarǵa aýyr soqqan indettiń ekinshi tolqynynan keıin bul nátıje jaǵdaıdy jaqsartady dep otyr. Vaksına alýǵa ruqsat etilgen halyqtyń 75 paıyzyna ekpeniń birinshi komponentin, al 30 paıyzyna ekeýin de salyp úlgergen.
1 mıllıardtyq mejege 40 aptadan az ýaqyt ishinde qol jetkizilgen. Al eldegi vaksınanyń alǵashqy dozasy 2021 jyly 16 qańtarda salyna bastaǵan. Bul 1 mıllıard vaksına dozasynyń barlyǵy derlik Úndistanda jasalǵanyn aıta ketken jón.
Osyǵan baılanysty Úndistannyń Qazaqstan Respýblıkasyndaǵy elshisi Shýbdharshını Trıpatı pikir bildirdi.
– Qazirgideı kúrdeli kezeńge qaramastan, Úndistan mańyzdy mejege az ýaqyt ishinde qol jetkizdi. Elimizdiń mundaı jetistikke jetýi tııanaqty josparlaýdyń, júzege asyrýdyń, kásibı ǵylymı-zertteý jumystarynyń nátıjeli bolǵanyn kórsetedi, – dedi Úndistannyń Qazaqstandaǵy elshisi.
Ol sondaı-aq Úndistan álemniń 150-den astam elimen óziniń resýrsymen, bilimi, tájirıbesimen jáne dári-dármekpen bóliskenin málimdedi.
Eldiń premer-mınıstri bul nátıjeni úlken jetistikke balap, «úndi ǵylymynyń jeńisine, 1,3 mıllıard úndi halqynyń iskerligi men ujymdyq rýhyna kýá bolyp otyrmyz» dep jazdy Twitter paraqshasynda.
Elde indettiń úshinshi tolqyny beleń alýy múmkin degen qorqynysh azaıa bastady. Al kóptegen bastaýysh synyptarynyń oqýshylary 2020 jyldyń naýryzynan bastap jabylǵan mektepterine orala bastady.
Johns Hopkins Bloomberg Qoǵamdyq densaýlyq saqtaý mektebinde jumys isteıtin Nıý-Delıdegi epıdemıolog Braıan Val bul oqıǵany úlken jetistikke teńedi. Onyń oıynsha, vırýstyń jyldam taralýy men joǵary vaksınalaý deńgeıin eskere otyryp, indettiń úshinshi tolqyny ekinshisimen teń nemese odan da aýyr bolýy múmkin degen boljamdardyń oryndalýy ekitalaı.
Úndistanda iri vaksına óndirýshi Serum ınstıtýty ornalasqanyna qaramastan qańtarda bastalǵan vaksınalaý prosesi baıaý júrgen. Oǵan halyqtyń ekpe alýǵa nıetiniń tómendigi men jetkizý máseleleri qosylǵan. Alaıda «Delta» shtamy taraǵannan bastap vaksınaǵa degen suranys kúrt ósken.
Úndistan 18 jasqa deıingi balalardy vaksınalaýdy áli bastaǵan joq, bul el halqynyń 40 paıyzyn quraıdy. Sondaı-aq turǵyndar arasynda indetten tolyq qorǵaıtyn vaksınanyń ekinshi komponentin alýǵa degen yntanyń azaıa bastaǵany da aıtyla bastady. Bılik ókilderi de bul máseleden habardar. Sol sebepti úkimet aımaq basshylaryn vaksınanyń ekinshi dozasyn salýdy nazarǵa alýǵa shaqyrdy. Jáne eki doza arasyndaǵy úlken aıyrmashylyqty joıýdyń joldary qarastyrylyp jatqany da habarlanǵan.
Indet órshigen tusta halyq vaksınaǵa muqtaj bolyp, ekpe alýǵa asyqqan, al tolqyn aıaqtalyp, jaǵdaı jaqsara bastaǵanda adamdar burynǵy ómir yrǵaǵyna qaıta oralyp, ekpeniń ekinshi bóligin alýdy umytyp ta ketken sekildi.
Úndistanda pandemııa bastalǵaly beri 34 mıllıon adam indet juqtyrǵan jáne 450 myńnan astamy qaıtys bolǵan. Táýelsiz epıdemıologter vırýstyń taralýy men ólim-jitimniń naqty sany resmı statıstıkadan áldeqaıda joǵary bolýy múmkin dep esepteıdi.
Degenmen Úndistan az ýaqytta jetken, ıaǵnı joǵaryda atalǵan nátıjeni jaqsylyqqa balap, indettiń taralýyn azaıtady dep úmittenip otyr.
