BQO polısııa departamentiniń baspasóz qyzmeti málim etkendeı, 58 jastaǵy Dına Stanko bıylǵy 24 tamyzda shamamen saǵat 17.00-de úıinen shyǵyp ketkennen oralmaǵan.
Ony izdestirýge qalalyq polısııa basqarmasynyń jeke quramy jumyldyryldy. Oraldaǵy beınebaqylaý kameralary qaralyp, turǵyndarǵa suraý salyndy. Kýágerlerdiń sózinen áıeldiń Jelaev kenti jaqqa ketkeni belgili bolǵan.
Dúken qyzmetkeri, 1967 jylǵy turǵyn Jelaev kenti aýdanyndaǵy ormannan sańyraýqulaq jınap júrgen kezinde áıeldiń bas súıegi men múrde qaldyqtaryn tapty.
Polısııa departamentiniń málimetinshe, súıek qaldyqtary sot-medısınalyq saraptamaǵa jiberildi.
Saraptama qorytyndysyna sáıkes ólimniń sebebi anyqtalady. Marqumnyń týystary oqıǵa bolǵan jerden áıeldiń kıimderin tanydy.
Sonymen qatar áıeldiń sińlisi men onyń tisterin emdegen stomatologtarmen birge tisteri alynyp, zerdelendi.
Oqıǵanyń mán-jaıy anyqtalyp, tergeý júrgiziledi.
