Saýda jáne ıntegrasııa mınıstrliginiń tutynýshylardyń quqyqtaryn qorǵaý komıtetiniń habarlaýynsha, bıyl alǵashqy alty aıda memlekettik organdar óz quzyreti sheńberinde tutynýshylardyń tarapynan túsken 21 100 ótinishti qaraǵan. Bul byltyrmen salystyrǵanda 5 061-ge az. Shaǵymdardyń basym bóligi bólshek saýda taýarlaryna tıesili. Saýda júrgizýshilerdiń kóbi sapasyz taýarlardy satý barysynda aqshany qaıtarýdan bas tartqan. Elektrondy saýda bóliginde ótinishter sany 3,6 ese artqan.
«Taldaýǵa sáıkes, tutynýshylardyń quqyqtary kóbinese medısınalyq qyzmetter salasynda buzylady, onda shaǵymdardyń sany 72 paıyzǵa artty. Azamattardyń narazylyǵy dárihanalardaǵy dári-dármek baǵasynyń ósýine, jedel medısınalyq járdemdi uzaq kútýge, emhanadaǵy kezekterge, medısına mamandarynyń biliktiliginiń tómendigine baılanysty. Budan basqa, densaýlyq saqtaý salasyndaǵy ýákiletti organ ónimniń qaýipsizdigine monıtorıng júrgizdi, onyń barysynda tamaq ónimderiniń 12 117 úlgisi zertteldi, onyń 1 376-sy belgilengen talaptarǵa jaýap bermedi. Sondaı-aq halyqtan qarjy, kólik qyzmetteri, baılanys, TKSh sapalaryna qatysty kóptegen shaǵymdar kelip tústi», delinedi mınıstrlik habarlamasynda.
Máselen, qarjy sektory boıynsha negizinen ekinshi deńgeıli bankterdiń jáne bank operasııalarynyń jekelegen túrlerin júzege asyratyn uıymdardyń, mıkroqarjy, saqtandyrý uıymdarynyń qyzmetindegi máseleler boıynsha shaǵymdar bolǵan.
Al kólik qyzmetteri salasynda ótinishter sany 6 ese tómendegen. Bul birinshi kezekte pandemııadaǵy jolsapardyń azaıýyna baılanysty. Baılanys salasynda da ótinishter statıstıkasy tómendepti. Shaǵymdardyń negizgi sebepteri – ınternettiń álsiz sapasy, tarıfti ózgertýdiń qıyndyǵy, aqshany negizsiz alý.
Turǵyn úı-kommýnaldyq sharýashylyǵy salasyndaǵy shaǵymdar jylýmen, energııamen jabdyqtaý boıynsha sapasyz servıske, tarıfterdiń shamadan tys mólsherine jáne kommýnaldyq qyzmetterge aqy tóleý boıynsha negizsiz esepteýlerge, elektr energııasyn esepke alý aspaptaryn zańsyz tekserýge jáne aýystyrýǵa, elektr energııasyn óshirýge jáne basqa da kóptegen problemalarǵa baılanysty eken. 2020 jyly tutynýshylardyń quqyqtaryn qorǵaý máseleleri boıynsha áleýmettik saýaldama júrgizildi, onyń nátıjeleri azamattardyń densaýlyq saqtaý jumysyna eń kóp narazylyǵyn anyqtady deıdi mınıstrlik.
«Respondentterdiń 45,9 paıyzy medısınalyq qyzmet kórsetý sapasyn teris baǵalady. Bul qyzmetterge Almaty qalasynyń turǵyndary – 65,5 paıyz, Almaty oblysy – 61,1 paıyz jáne Shyǵys Qazaqstan oblysy 60,0 paıyz qanaǵattanbaıdy. Ekinshi orynda temirjol kóligi boldy, onda respondentterdiń qanaǵattanbaý paıyzy 43,2 paıyzdy quraıdy. Temirjol qyzmetteriniń sapasyna qanaǵattanbaǵandardyń basym bóligi Shymkentte – (51,4 paıyz), Almatyda – (50,3 paıyz), Almaty oblysynda (48,8 paıyz) turady. 42 paıyz teris jaýap alǵan qalaaralyq jáne avtomobıl kóligine de qatysty. Tutynýshylar sotqa júginbesten buryn úsh satyly tetiktiń alǵashqy eki kezeńinen dáıekti túrde ótýge mindetti. Birinshi kezeń – satýshy jáne tutynýshylyq daýlardy sotqa deıin retteý sýbektisi. Ekinshi kezeń – memlekettik organ. 2021 jyldyń 5 aıynda tutynýshylyq daýlar boıynsha sottarǵa 916 talap aryz tústi. Onyń ishinde: 339 nemese 37 paıyzy sotqa deıingi retteýge birinshi kezeńge qaıtaryldy, 235 nemese 26 paıyzy ýákiletti organǵa júginý qajettiligine silteme jasaı otyryp qaıtaryldy» dep habarlady vedomstvo.
