Soǵan sáıkes Palatanyń aldaǵy jalpy otyrysynda «Qazaqstan Respýblıkasynyń keıbir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobasy qaralady.
Zań jobasy kiristerdi jylystatýǵa jáne terrorızmdi qarjylandyrýǵa qarsy is-qımyl máselelerine qatysty zańnamalardy, sondaı-aq, ulttyq qaýipsizdikti qamtamasyz etý júıesin jetildirýdi kózdeıdi. Osy qujat arqyly jarııa laýazymdy tulǵalar iske asyratyn operasııalar baqylaýǵa alynady. Iаǵnı, jaýapty memlekettik laýazymdaǵy jáne memlekettik mekemelerde nemese kvazımemlekettik sektorlarda basqarý qyzmetin atqaratyn azamattardyń operasııalary baqylaýda bolady.
Sonymen qatar Bıýro músheleri «Aýyl sharýashylyǵyn damytýdyń ózekti máseleleri men perspektıvalary» taqyrybyna arnalǵan parlamenttik tyńdaýǵa daıyndyq barysyn pysyqtady. Atalǵan is-shara bıylǵy 3 jeltoqsanda ótkiziledi dep josparlanýda.
«Parlamenttik tyńdaýda Memleket basshysynyń Joldaýynda aıtylǵan aýyl sharýashylyǵyn damytýǵa qatysty ózekti máseleler talqylanady. Osy saladaǵy jahandyq syn-qaterler men álemdik trendterge de nazar aýdaramyz. Jaqynda Prezıdentimiz Ulttyq jobalar tizbesin bekitti. Jobalardyń biri agroónerkásiptik keshendi damytýǵa arnalǵany belgili. Tyńdaý kezinde atalǵan Ulttyq jobany tıimdi júzege asyrý máselesi de nazardan tys qalmaıdy. Sondyqtan bul is-sharany joǵary deńgeıde jáne mazmundy túrde ótkizýimiz kerek», dedi Máýlen Áshimbaev.
