Baıan-О́lgeı qalasynda turatyn kishkentaı qazaq kórermender 2011 jyly tikeleı Elbasy, Qazaqstannyń Tuńǵysh Prezıdenti Nursultan Nazarbaevtyń qoldaýymen júzege asqan, bolashaqtyqtardyń «О́zińnen basta» qorynyń jobasy aıasynda onlaın-kınoteatrlarda kórsetiletin dýblıajdalǵan mýltfılmderdiń birin de qalt jibermeı, úzbeı tamashalaıdy.
«Biz Mońǵolııada turatyn qazaq balalary, sizderge «О́zińnen basta» jobasy úshin alǵys bildirgimiz keledi. Osyndaı ıgi ispen aınalysyp, tamasha fılmderdi sapaly dýblıajben ana tilinde usynǵandaryńyz úshin rahmet. Shetelde turatyn qazaqtar úshin bul keremet múmkindik. О́zge tilderde kórý múmkindigi bolýyna qaramastan, ana tilinde tamashalaýdyń jóni bólek. Ol – erekshe sezim. Jobany toqtatpaı, ary qaraı damyta berińizder. Osyndaı qyzyqty gollıvýdtyń týyndylar qazaq tilinde jıi shyqqanyn qalaımyn», dedi joba jankúıerleriniń biri Dýlat Arafat.
Sondaı-aq balalar vıdeoda «Bolashaq» baǵdarlamasynyń túlekteri qurǵan qordy 10 jyldyq mereıtoıymen quttyqtady.
Aıta ketsek, bolashaqtyqtardyń sheteldik fılmderdi memlekettik tilge dýblıajdaýy álemdegi biregeı jáne birden bir jeke bastama.
10 jyl ishinde «О́zińnen basta» jobasy aıasynda bıýdjetten tys qarajat esebinen Disney, Pixar, Marvel jáne Sony Pictures sekildi jetekshi álemdik kınostýdııalardyń 37 fılmi eń joǵary halyqaralyq standart boıynsha tikeleı aǵylshyn tilinen qazaq tiline dýblıajdaldy. Olardyń ishinde «Mýlan», «Batyl júrek», «Koko qupııasy», «Moana», «Malefısenta», «Aladdın», «Jan» kartınalary bar.
25 qarashada qazaqstandyqtarǵa qazaq tilindegi taǵy bir álemdik premera – «Enkanto» fılmi jol tartpaq.
Eske sala ketsek, buǵan deıin «Bolashaq» qorynyń Qamqorshylyq keńesiniń qurmetti múshesi Baýyrjan Baıbek qazaq tili túrik tilinen keıingi dýblıajdaǵy ekinshi túrki tili jáne «Walt Disney» kompanııasynyń tarıhyndaǵy 39-shy til bolǵanyn aıtqan edi. Sonymen qatar, qazaq tili Shyǵys Eýropa men TMD elderi úshin shyǵarylatyn Blu-Ray-da kórýge arnalǵan qoljetimdi gollıvýdtyq fılmderdiń 7 negizgi tilderiniń qataryna endi.
Jobanyń arqasynda búginde 100-den astam qazaqstandyq akter «Walt Disney Pictures» daýystyq bazasynda tur. Shyǵarmashylyq jáne tehnıkalyq mamandyqtardyń 203 ókili «Walt Disney Pictures» stýdııasynyń standarttary negizinde dýblıaj boıynsha oqýdan ótti.
