Zań jobasy jylý energetıkasy týraly zańnamany buzǵany úshin jazanyń bultartpastyǵy qaǵıdatyn iske asyrýǵa baǵyttalǵan.
Atap aıtqanda, joǵary energııa tutyný tutynýshylardyń kinásinen júzege asyrylatyn jaǵdaılardy qospaǵanda, ǵımarat paıdalanýǵa berilgen soń bes jyldan keıin energııa tıimdiliginiń belgilengen synybyna qol jetkizbegeni úshin jaýapkershilik kózdeletin bap paıda bolady. Bul buzýshylyq úshin ǵımarat salýshyǵa aıyppul qarastyrylǵan.
Budan basqa, jylý energııasyn tutyný kezinde onyń ysyrabyn azaıtý jónindegi is-sharalardy oryndamaǵany úshin jazalaý josparlanýda.
Áńgime kóp páterli turǵyn úılerdi jylý boıynsha jańǵyrtý týraly bolyp otyr, mundaı is-sharalar, keste men merzimder múlik ıeleri birlestiginiń, jaı seriktestiktiń nemese páter ıeleri kooperatıviniń sheshimimen belgilengen tártippen aıqyndalǵan.
Belgilengen normalar buzylǵan jaǵdaıda múlik ıeleri birlestiginiń birinshi basshysyna nemese tıisinshe, jaı seriktestiktiń nemese páter ıeleri kooperatıviniń birinshi basshysyna aıyppul kózdeledi.
Aıyppul mólsheri áli anyqtalǵan joq.
Energetıka mınıstrliginde atap ótkendeı, qoldanystaǵy zańnamada jylý energetıkasy salasyndaǵy sýbektilerge qatysty ákimshilik sharalardy qoldaný máselesi ishinara qamtylǵan.
«Qazaqstan Respýblıkasyndaǵy aǵymdaǵy jaǵdaıdy jáne jylý energetıkasy salasyndaǵy sheteldik zańnamany taldaýdy negizge ala otyryp, adal sharýashylyq júrgizýshi sýbektiler úshin yntalandyrý sharalary júıesin qalyptastyrýmen qatar, memlekettik baqylaýdyń jáne talaptardy buzǵany úshin jaýapkershiliktiń tolyqqandy júıesin qalyptastyrý qajet. Osyǵan baılanysty, «Ákimshilik quqyq buzýshylyq týraly» Kodeksti jylý energetıkasy týraly zańnamany buzǵany úshin jaýapkershilik sharalarymen tolyqtyrý qajet», delingen qujatta.
Zań jobasy 30 qarashaǵa deıin «Ashyq NQA» saıtynda jarııa talqylaý úshin ornalastyrylǵan.
