Osydan jeti jyl buryn Elbasy Nursultan Nazarbaevtyń qatysýymen ótken kásiporynnyń ashylý rásiminde Tuńǵysh Prezıdent elimizde turǵyn úı qurylysy men qoljetimdi baspananyń aýqymdy baǵdarlamasy júzege asyrylyp jatqanyn tilge tıek ete kelip, mundaı kombınattar baspana baǵasyn tómendetýge múmkindik beretinin jáne jańa kásiporynǵa memlekettik baǵdarlamalar arqyly qoldaý kórsetilýi tıis ekenin aıtqan edi.
Sol kezde eń ozyq zamanaýı qurylǵylarmen jabdyqtalǵan kombınattyń iske qosylýy nátıjesinde qurylys jumystarynyń merzimi 2,5 ese qysqaratynyn, al ózindik quny 20-30 paıyzǵa arzandaıtynyn jetkizgen kásiporyn basshylary 150 adamnyń jumysqa qabyldanǵanyn jáne jylyna 70 myń sharshy metr turǵyn úı salýǵa qaýqarly ekendikterin súıinshilegen.
Alaıda taıaýda ǵana atalǵan kásiporynnyń dırektory Vladımır Annenko oblystyq kásipkerler palatasynan qoldaý surap, Qostanaı tóńiregindegi qurylys naryǵynyń qajetin keń aýqymda óteı alatyn múmkindigi bola tura, kombınat búginde 30-aq paıyzdyq júktememen jumys istep jatqanyn aıtty.
– Úı qurylysy kombınaty joǵary sapaly temirbeton buıymdarynyń jáne taýarlyq betondar men qurylysqa qajet eritindilerdiń 300-den astam túrin óndiredi. Kásiporynnyń basty mindeti – iri paneldi úılerge arnalǵan qurylys materıaldaryn shyǵarý. Bizdiń materıaldardy, ásirese, áleýmettik turǵyn úı qurylysynda paıdalanǵan tıimdi. Soǵan qaramastan, jergilikti jerde shyǵarylatyn ónimderdi búgingi qurylys naryǵy kóp qajetsinbeı otyr, – dedi V.Annenko.
Elimizde úı qurylysy kombınattaryna (ÚQK) qoldaý kórsetý týraly túrli baǵdarlama da bar. Máselen, 2020-2025 jyldarǵa arnalǵan «Nurly jer» memlekettik baǵdarlamasynda 2022 jylǵy qurylys jumystaryna ÚQK ónimderiniń kem degende 50 paıyzy paıdalanylýy tıis ekendigi aıtylǵan. Sondaı-aq úı qurylysy kombınattaryn damytýdyń 2021-2025 jyldarǵa arnalǵan jol kartasynda Qostanaı úı qurylysy kombınatynyń qurylys buıymdaryn óndirý júktemesin 5 jyl ishinde 21 myń sharshy metrden 56 myń sharshy metrge deıin ulǵaıtý kózdelgen. Úkimettiń baǵdarlamalyq qujattary da búginde jer-jerde qarqyndy júrip jatqan qurylys jumystaryna ÚQK-ler óndirip jatqan qazaqstandyq qurylys materıaldaryn keńinen paıdalanýdy mindetteıdi.
Alaıda qazirgi zamanaýı qurylysqa kóbine-kóp kirpish paıdalanylatyndyqtan, iri paneldi úılerdi qurastyrýǵa daıyn materıal shyǵaratyn úı qurylysy kombınattary naryqtaǵy óz úlesterinen qaǵylyp otyr. Kirpishtiń qymbat ekenin alǵa tartqan kombınat basshysy, oǵan qaraǵanda edáýir arzan ári tez salynatyn paneldi úıler qurylysynyń úlesin arttyrý qajettigin aıtady.
– Kirpish úılerdiń syrtqy jáne ishki qabyrǵalaryn kóterý úshin, kem degende 30 nemese 40 maman kerek. Al iri paneldi úılerdi 5-6-aq maman qurastyryp shyǵa alady. Bul qurylys sapasyn saqtaı otyryp, óndiristi arzandatýǵa múmkindik beredi. Munyń syrtynda, búginde turǵyn úıdiń baǵasy da kún sanap qymbattap jatyr. Sondyqtan turǵyndardy arzan ári sapaly baspanamen qamtamasyz etý úshin ózimizden shyǵatyn jergilikti ónimniń úlesin arttyrý jaǵyn oılastyrý kerek, – dedi V.Annenko.
Kásipkerler palatasynyń dırektory Danııar Kúzenbaevtyń aıtýynsha, úı qurylysy kombınaty kóterip otyrǵan máseleniń bir ushyǵy qarapaıym halyqty qoljetimdi baspanamen qamtý sııaqty asa mańyzdy áleýmettik máselemen astasyp jatyr. Muny jergilikti atqarýshy oryndardy qatystyra otyryp sheshýge bolady.
Qostanaı úı qurylysy kombınatynyń máselesi aldaǵy ýaqytta memlekettik satyp alýlardaǵy jergilikti qamtýdy baqylaý jónindegi óńirlik komıssııa otyrysynda qaralmaq.
Qostanaı oblysy
