Asqaq rýh, aıdyndy aksııa

Bir mezette, bir daýysta, bir adamdaı bir maqsatqa birikken órimdeı jastar – órshil rýhpen Ánurandy shyrqap tur. Árbir sózin nyq, ár árpin anyq aıtady. Kózderinen jalyn atady. Eline, jerine, halqyna degen erekshe iltıpaty men qurmetin «Meniń Qazaqstanyma» salyp, bildirip turǵandaı. Jastardan eshqandaı jasandylyq baıqamadyq. Qaıta Qazaq elin ynta-shyntasymen jaqsy kóretinin aıqyn ańǵardyq. Janyńdy jadyratyp, janaryń jasaýraıtyn kórinis edi bul. Shyǵystan bastaý alǵan «Máńgilik El» estafetasy Syrdyń topyraǵyna jetti. «Muz aıdynyna» kirip barǵanda joǵaryda aıtqan sáttiń tap ústinen tústik. Aıdynnyń ishin rýh kernep tur eken. Sol sát jabyq alańnyń túńligi jelpildep turǵandaı áser etkeni bar. Qazaq jastary memlekettigimizdiń máńgilikke ulasqanyn bar yqylasymen tileıtinin kózben kórdik. Mundaı jıyndardyń aldynda biraz daıyndyq bolatyny belgili. Qaı jerde qol shapalaqtap, qaı jerde urandaý kerektigi de aıtylatyn shyǵar-aý. Biraq Ánurandy bulaı aıt degen eshkimniń bolmaǵanyna bás tige alamyz. О́ıtkeni, «Meniń Qazaqstanym» jastardyń júreginen órilip shyǵyp, únimen jan-júıeńdi bir aralap, asqaq rýhtyń sıpatynda aspanǵa áýelep bara jatty. Sonaý túrki zamanynda babalarymyz máńgilik eldi murat qylǵanyn tarıhtan bilemiz. Tasqa qashalǵan tarıhtaǵy tábárik sóz «Mıngý el» edi. Túbi túrki tildes elderdiń bárine túsinikti sóz. Babalarymyz aspan aman, pil saýyrly qara jer aman turǵanda sol eki ortany jaılaımyz, urpaǵymen máńgi jasaımyz dese kerek. Tamyrda bar qasıet qaıta tutanbaı qoımaıdy. Ǵasyrlar boıǵy otarlyqtan soń azattyǵyn alyp, aınalasyn bajaılap, oń-solyn tanyp jáne ózin tanytyp, jaǵdaıyn túzep alǵan Qazaqstan máńgilikke qol sozdy. Ol tikeleı Elbasynyń ózinen bastaý aldy. Bıylǵy Joldaýda «Máńgilik El» muraty usynyldy. Táýelsizdiktiń alǵashqy jyldarynan beri «bizde ulttyq ıdeologııa bar ma?» dep ortaǵa saýal tastaǵan adamnyń sanynan jańylatyn shyǵarmyz. Mine, sizge ulttyq ıdeologııanyń atasy! Budan artyq, budan asqan eshqandaı murat bolmasa kerek-ti. Bar halyq qoldaıtyn, qarǵa tamyrly qazaq basty qaǵıdasyna aınalatyn maqsat osy dep bilemiz. Halyq tarapynan qoldaý kórmeı jatqan joq. Sonyń aıqyn dáleli retinde jer-jerde «Máńgilik El» estafetasy ótip jatyr. Biz kórgen jastar «Máńgilik El» estafetasyn kezekti flesh-mob retinde qabyldaǵanyn aıttyq. Iаkı, Elbasy bastap, halyq qostaǵan bastamanyń alǵashqy irgetasy qalanyp jatyr degen sóz. Jıynda sóz alǵan Qyzylorda oblysynyń ákimi Qyrymbek Kósherbaev jan-jaqty tolǵady. – Bir kezderi Edilinen aıyrylyp, eńsesi túsken qazaqty Esilinen de aıyrylyp qalmas úshin ulan-baıtaq qazaq jeriniń qasıetti arqasy – Saryarqada Elbasymyz Eýrazııa júregine Astanamyzdy saldy. Elimiz barlyq ult pen ulystyń beıbitshilik ordasyna aınalyp, toleranttylyqtyń erekshe úlgisin jasaı bildi. Elbasynyń Qazaqstan halqy Assambleıasynda «Máńgilik El» patrıottyq aktisin ázirlep, qabyldaýdy tapsyrǵany osyǵan dálel. Biz – bir shańyraqtyń astyndaǵy múddesi bir, maqsaty ortaq, júzi basqa bolsa da  júregi bir, tili basqa bolsa da tilegi bir, tatý-tátti ómir súrip jatqan halyqpyz. Aýyzbirligimiz myqty bolǵanda ǵana Qazaq eliniń túpki muraty – Máńgilik Elge qol jetkize alamyz. Endigi urpaqtyń mindeti – osy táýelsizdikti baıan­dy etip, Máńgilik El bolý. Biz jastarǵa senemiz. Syr eliniń jas­tary Elbasynyń uly ıdeıasyn júzege asyrýda birinshi bolýy kerek. Qazaqstan – bekem birligi, tatý tirligi, yrysty yntymaǵy bar el. Qazaqstan – Máńgilik El!– dedi ákim. Jıynǵa qazaqtyń aqıyq aqy­ny, qoǵam qaıratkeri Oljas Sú­leımenov arnaıy ke­lip qatysty. Máńgilik Eldiń mura­ty týraly keńinen qozǵady. Jas­tarǵa jalyndy sózderin arna­dy. Qory­tyndylaı kele, Qyzyl­ordanyń qazirgi kelbetine toqtaldy. – Syrdyń boıy jańasha túlep kele jatyr. Ár kelgen saıyn óńirdiń órkendegenin kóremin. Zamanynda Abaı «Árbir hakim ǵalym bolýy kerek» degen. Uly aqynnyń sózin osy kúnge ıkemder bolsaq, «árbir ákim ǵalym bolýy kerek» bolyp shyǵady. Ǵalym adam bárin aqyl tarazysyna salyp, oı eleginen ótkizip jasaıdy. Qyzylordanyń búgingi damýy da ǵylymı turǵydan jasalǵan qadam. О́ıtkeni, qazirgi ákim Qyrymbek Kósherbaev naǵyz ǵalym adam,– dedi. «Máńgilik El» estafetasyn­da jas býynnyń atynan oblys­tyq «Jasyl el» jastar qozǵa­ly­synyń jetekshisi Jasulan Al­dabergenov te sóz aldy. Shara barysynda «Nurgúl» bı ansambli «Jasa, Qazaqstan!» áýenine horeo­grafııalyq kartına jasady. Án shyrqaldy. Túrli kórinis kór­setildi. Solaısha, «Meniń Qazaq­stanymmen» bastalǵan estafeta «Atameken» ánimen aıaqtaldy. Al osy aralyqta biz jastardyń jigerin anyq kórdik, ulttyq rýhpen sýsyndap ósip kele jatqanyn baıqadyq. Erjan BAITILES, «Egemen Qazaqstan». QYZYLORDA.