Atalǵan konkýrs otandyq ǵylymnyń damýyna eleýli úles qosqan ǵalymdar men ǵylymı qyzmetkerlerdiń eńbegin baǵalaý baǵytynda qolǵa alynǵan. Bilim jáne ǵylym mınıstrligi janyndaǵy Ǵylym komıtetiniń tóraıymy Janna Qurmanǵalıeva bul týraly: «Qazirgi tańda otandyq ǵylym salasynda damýdyń jańa sapaly kezeńi bastalǵandaı. Ǵalymdarymyzdyń eńbekteri álemdik naryqqa shyǵyp jatyr. Jaqynda ǵana biz 14 qazaqstandyq ǵylymı ázirlemeniń Qytaı, Reseı, Túrkııa, Grýzııa, Chehııa jáne Qyrǵyzstanǵa eksportqa shyǵarylatyny týraly málimdegen edik. Memleket basshysynyń tapsyrmasy boıynsha mınıstrlik ǵalymdar men ǵylymı uıymdardyń, joǵary jáne joǵary oqý ornynan keıingi bilim berý uıymdarynyń qyzmetkerlerin jan-jaqty qoldaý máselelerine nazar aýdarady. Qazaqstandyq ǵalymdardy yntalandyrý jáne ǵylymı qyzmettiń bedelin arttyrý boıynsha sharalar ázirlenip, iske asyrylyp keledi. Bıyl mınıstrlik alǵash ret elimizdiń úzdik ǵalymdaryna 50 syıaqy taǵaıyndamaq. Olardyń árqaısysy shamamen 6 mln teńgeden alady», dedi.
Komıtet basshysynyń aıtýynsha, ǵylymı jetistikterdi baǵalaıtyn barlyq krıterıı ǵylymı jáne sarapshylar qaýymdastyǵymen birlesip ázirlengen. Baıqaý komıssııasynyń quramyna elimizdiń túrli baǵytta qyzmet etetin jetekshi ǵalymdary men ǵylymı qoǵamdyq birlestikterdiń ókilderi kirdi.
Konkýrsqa qatysýǵa ótinim mınıstrliktiń https://universitycontest.iac.kz/bestresearcher/ aqparattyq júıesi arqyly elektrondy formatta 15 jeltoqsanǵa deıin qabyldanady. Úmitkerlerdiń ǵylymı jetistikteri ǵylymı dárejesi, ǵylymı ataǵy, ǵylymı jarııalanymdary men monografııalarynyń bolýy, ǵylymı jobalar men baǵdarlamalarǵa basshylyq jasaý sııaqty krıterııler boıynsha baǵalanady. Bul rette úmitker sońǵy jyly ýnıversıtette keminde bir pándi júrgizip, sondaı-aq sońǵy 3 jylda PhD fılosofııa doktory ǵylymı dárejesi bar kadrlardy daıarlaýy jáne ǵylym máseleleri jónindegi konsýltasııalyq organdardyń jumysyna qatysýy mindetti. Sonymen birge baıqaýǵa qatysýshy ǵylymı ázirlemeleriniń óndiriske engizilýi boıynsha nátıjelerin usynýy qajet.
Baıqaý qorytyndysy boıynsha jeńimpazdarǵa 2000 AEK kóleminde syıaqy beriledi. Bul 5 mln 834 myń teńgeni quraıdy.
