Aımaqtar • 24 Qarasha, 2021

Qaraǵandy kenshileriniń eńbekaqysy kóteriletin boldy

69 ret kórsetildi

О́ńirlik kommýnıkasııalar qyzmeti alańqaıynda ótken brıfıngte Qaraǵandy oblysynyń ákimi Jeńis Qasymbek «Abaı» shahtasynda bolǵan tótenshe oqıǵa boıynsha qurylǵan kelisim komıssııasy jumysynyń qorytyndysyn baıandady, dep jazady Egemen.kz.

Eske sala ketsek, 7 qarasha kúni «ArselorMıttal Temirtaý» AQ Kómir departamentine qarasty «Abaı» shahtasynda kómir men gazdyń atyndysy bolyp, apattyń saldarynan oqıǵa bolǵan jerde alty kenshi kóz jumǵan edi.

Quramyna kenshilerdiń kásipodaq uıymdary, shahtalardyń belsendileri, jergilikti atqarýshy organ ókilderi engen kelisim komıssııasyna basshylyq etken oblys ákimi 10 kún boıy júrgizilgen tegeýrindi jáne tabandy jumystyń nátıjesinde shahterler kótergen ózekti máselelerdiń túgelge derlik oń sheshim tapqanyn málimdedi.

Brıfıngte Jeńis Qasymbek alpaýyt kásiporynǵa qarasty barlyq shahtany aralap shyqqanyn aıtty.

– Shahtalarda kenshilermen bolǵan kezdesýlerde olardy tolǵandyrǵan barlyq máselelerdi ashyq túrde talqyladyq. Jalpy shahterler basshylyq aldyna uzyn sany 12 talap qoıdy. Men olardyń barlyǵy da ádil dep sanaımyn, – dedi oblys ákimi.

Kelisim komıssııasy jumysynyń nátıjesine kelsek, «ArselorMıttal Temirtaý» kompanııasy jyl saıyn 1 qańtardan bastap ınflıasııa deńgeıiniń 100% kóleminde eńbekaqyny ındeksteýdi júzege asyrýy tıis. О́ndiristik-ekonomıkalyq kórsetkishter josparynyń oryndalýyna qaramastan, aldymyzdaǵy jeltoqsan aıynda 13-shi eńbekaqy tólenetin bolady.

– Eń bastysy, jeltoqsan aıynda kenshilerdiń eńbekaqysy 15-17 paıyzǵa kóteriledi, – dep atap ótti Jeńis Qasymbek.

Sonan soń, kadr tapshylyǵyn joıý úshin jeltoqsan aıynyń sońyna deıin normatıvti sandyq jáne shtattyq keste ázirlenedi. Soǵan saı, shtat tolyq qamtylǵanǵa deıin aı saıyn kem degende 100 adam jumysqa ornalastyrylýy  kerek.

Kenshilerdi tasıtyn jumys avtobýstary jartylaı ǵana jańarypty, endi olar tolyǵymen jańasyna aýysytyrlatyn bolady. Kásiporynda 2018 jyldyń 1 qańtarynan keıin jumysqa ornalasqan qyzmetkerlerdiń demalys kúnderi az eken, aldaǵy ýaqytta onyń sany kóbeıtiledi. Sondaı-aq, uzaq ýaqyt aýyrǵan adamdardyń eńbekke jaramsyzdyq paraqshasyndaǵy tólemder 50 AEK-ke deıin arttyrylatyn bolady.

Budan bylaı kásiporyn eńbek qaýipsizdigine burynǵydan beter kóńil bóletin bolady. Bul turǵyda shahtalardyń bárinde tehnıkalyq aýdıt júrgizilip, eskirgen jabdyqtar paıdalanýdan shyǵarylady. Sonymen birge,  taý-ken-geologııalyq jaǵdaılarǵa baılanysty josparlaý tapsyrmalaryna da  túzetýler engiziledi.

«Kenshilerdiń basty talabyna saı, shahtalardaǵy qural-jabdyqtardyń jaı-kúıi, shahtalardyń bolashaǵy, olarǵa salynatyn ınvestısııa boıynsha júrgiziletin aýdıt jumystary eki aıdyń ishinde aıaqtalyp, onyń qorytyndysy boıynsha tıisti sheshimder qabyldanýy tıis», dep atap ótti J.Qasymbek.

Apat jıi bolatyn alpaýyt kásiporyndaǵy eńbek qaýipsizdigi problemasy kún tártibinde óte ótkir tur. Sol sebepti, bul baǵyttaǵy qordalanǵan máselelerdi sheshý maqsatynda jumys toby quryldy. Osy oraıda arnaıy mamandar 1996 jyldan beri bolǵan apattardyń barlyǵyn jan-jaqty jáne tereńdete tekseretin bolady. Taldaý negizinde naqty is-sharalar jospary jasalýy kerektigin atap ótti oblys ákimi.

О́ńir basshysy «ArselorMıttal Temirtaý» kompanııasynyń aldaǵy bes jyl ishinde kásiporynǵa 3 mlrd AQSh dollary mólsherinde ınvestısııa quıý jospary bar ekenin málimdedi. «Bul qarajattyń 35 paıyzy shahtalarǵa baǵyttalady. Jalpy kásiporyndaǵy qural-jabdyqtardyń jańartylmaýy eńbek qaýipsizdigine ǵana zııanyn tıgizbeıdi, sonymen qatar jospardyń oryndalýyna, soǵan saı kenshiler eńbekaqysynyń turaqty bolýyna da kedergi keltiredi. Bul másele erekshe baqylaýda bolady», dedi J.Qasymbek.

Al kásiporynǵa bıylǵy salynatyn ınvestısııa kólemi 140 mlrd teńgeni quraıdy eken. Sonyń 35%-y kenshilerdiń máselesin sheshýge arnalatyny aıtyldy.

Brfıngte Jeńis Qasymbek kenshilerdiń zeınetkerlik jasyn tómendetý boıynsha talabynyń Úkimettiń qaraýyna joldanǵanyn, jalpy bul baǵyttaǵy jumystardyń únemi nazarda bolatynyn jetkizdi.

– Kelisim komıssııasynyń jumysy aıaqtalǵan joq. Qabyldanǵan sheshimderdiń oryndalýyn ózim tikeleı qadaǵalaıtyn bolamyn. Ol úshin taraptar aı saıyn kezdesip, barlyq máseleni eki jaqty talqylaıtyn bolamyz, – dep sendirdi J.Qasymbek.

Brıfıngte oblys ákimi óńirdegi shahtalardyń bolashaǵy týraly «ArselorMıttal Temirtaý» kompanııasynyń basshylyǵymen arada búkpesiz   áńgime bolǵanyn aıtyp ótti. Alpaýyt kásiporynnyń basshylary aldaǵy 10-15 jyl ishinde bir de bir shahtanyń jabylmaıtynyn málim etken.

Degenmen, Jeńis Qasymbek kúni erteńderi qandaıda bir shahta jabyla qalǵan jaǵdaıda, oǵan daıyn bolý kerektigin eske saldy. «Sondyqtan biz bul baǵyttaǵy jumystardy kúsheıtemiz. Kenshiler kóp turatyn Abaı, Shahtınsk,  Saran sııaqty monoqalalarda jańa jumys oryndarymen qamtamasyz etetin kásiporyndardyń ashylýy, olardyń damýyna barynsha jaǵdaı jasaý jiti nazarda bolady. «Shaǵyn qalalarda turǵyn úı salý, joldar men áleýmettik nysandardy jóndeý, kóshelerdi abattandyrý syndy keshendi jumystar jalǵasyn taba beredi», dep málimdedi J.Qasymbek.

Brıfıngke qatysqan «ArselorMıttal Temirtaý» kompanııasynyń bas dırektory Bıdjý Naır jáne «Qorǵaý» kómirshiler kásipodaǵynyń tóraǵasy Evgenıı Býslaev kelisim komıssııasy jumysynyń qorytyndysymen túgeldeı kelisetindikterin jáne ol boıynsha qabyldanǵan sheshimderdiń tolyǵymen  oryndalýyna kúsh salatyndyqtaryn jetkizdi.

Sońǵy jańalyqtar

Bir kúnde 3907 adam koronavırýstan aıyqty

Koronavırýs • Búgin, 09:45

15169 adam koronavırýs juqtyrdy

Koronavırýs • Búgin, 09:17

Uqsas jańalyqtar