Parlament • 03 Jeltoqsan, 2021

Senatta aýyl sharýashylyǵynyń aýqymdy máseleleri talqylandy

43 ret kórsetildi

Senatta «Aýyl sharýashylyǵyn damytýdyń ózekti máseleleri men perspektıvalary» taqyryby boıynsha parlamenttik tyńdaý boldy. Salalyq komıtettiń depýtattary tyńdaýǵa daıyndyq barysynda birqatar sharalar ótkizip, problemalyq máseleler talqylandy, dep habarlaıdy Egemen.kz.

Senat Tóraǵasy Máýlen Áshimbaev tyńdaýdy asha kelip, elimizde aýyl sharýashylyǵy salasyn damytýǵa udaıy nazar aýdarylyp otyratynyn atap ótti. Alaıda Senat Tóraǵasy búgingi kúni áli de sheshilýi qajet problemalar bar ekenine toqtaldy. Olardyń qatarynda jaıylym tapshylyǵy máselesin sheshý, jeke qosalqy sharýashylyqtar men aýyl sharýashylyǵy kooperasııasyn damytý, veterınarııa jáne agrobıotehnologııa salalaryn jaqsartý, azyq-túlik taýarlarynyń baǵasyn retteý jáne t.b. bar.

«Jalpy aýyl sharýashylyǵy elimiz úshin strategııalyq salalardyń biri. Sondyqtan Memleket basshysy osy baǵytqa únemi basa mán berip keledi. Aýyl sharýashylyǵyn damytýdyń ekonomıkalyq jáne áleýmettik mańyzy zor. Búginde bizdiń azamattarymyzdyń 40 paıyzdan astamy aýyldyq jerlerde turady. Olardyń tabysy men ómir súrý sapasy agrarlyq salanyń damýyna tikeleı baılanysty. Sondyqtan jumystyń osy baǵyty Senatta basymdyqqa ıe», dep atap ótti Máýlen Áshimbaev.

Senat depýtaty Muhtar Jumaǵazıev óz kezeginde veterınarlyq qaýipsizdik salasynda oryn alyp otyrǵan problemalarmen jumys isteý qajettigin atap ótti. Senator derekterdi sıfrlandyrý, jınaý jáne avtomattandyrý prosesterin damytý, sondaı-aq joǵary bilikti mamandardy oqytý strategııasyn ázirleý mańyzdy dep sanaıdy.

«Senat depýtattary agroónerkásip keshenin damytý jáne azyq-túlik qaýipsizdigin qamtamasyz etý maqsatynda sapa týraly zań qabyldaý jáne qoldanystaǵy zańnamany odan ári jetildirý maqsatynda qarqyndy jumys istep keledi. Veterınarııa salasyn saýyqtyrý jóninde zań, sondaı-aq agrobıznestiń iskerlik belsendiligin arttyrýǵa jáne qolaıly ınvestısııalyq ahýal jasaýǵa múmkindik beretin basqa da qujattar qabyldandy. Sonymen qatar bıyl sheteldikter men azamattyǵy joq adamdarǵa aýylsharýashylyǵy jerlerin satýǵa jáne jalǵa berýge tolyqtaı tyıym salyndy», dedi senator.

Aýyl sharýashylyǵy salasyndaǵy aǵymdaǵy jaǵdaı týraly mınıstr Erbol Qarashókeev aıtyp berdi. Ol Memleket basshysynyń tapsyrmasy boıynsha Agroónerkásip keshenin damytý jónindegi ulttyq joba bekitilip, júzege asa bastaǵanyn atap ótti, ol aýyl sharýashylyǵyndaǵy eńbek ónimdiligin 2,5 esege arttyrýǵa, qazaqstandyqtardy otandyq óndiristiń negizgi azyq-túligimen qamtamasyz etýge, sondaı-aq agrobıznes ónimderiniń eksportyn eki esege arttyrýǵa múmkindik beredi.

Tyńdaý barysynda «Báıterek» holdınginiń Basqarýshy dırektory Murat Dáribaev AО́K-ti damytýdyń mamandandyrylǵan ınstıtýttary týraly, Ulttyq bıotehnologııa ortalyǵynyń bas dırektory Erlan Ramanqulov aýyl sharýashylyǵy salasyndaǵy zamanaýı bıotehnologııalyq tásilder jáne basqa da máseleler týraly baıandama jasady.

Senattyń salalyq komıtetiniń tóraǵasy Álı Bektaev parlamenttik tyńdaýdyń jumysyn qorytyndylaı kelip, aıtylǵan barlyq usynystar Úkimet pen múddeli mekemelerge usynymdar túrinde joldanatynyn atap ótti.

Sońǵy jańalyqtar

Petropavlda jas jigitti KamAZ qaǵyp ketti

Aımaqtar • 27 Mamyr, 2022

Uqsas jańalyqtar