Qoǵam • 06 Jeltoqsan, 2021

Qazaqstanda bir jylda 8662 órt oqıǵasy tirkeldi

60 ret kórsetildi

Bul týraly Májiliste ótken «Úkimet saǵaty» kezinde Tótenshe jaǵdaılar mınıstri Iýrıı Ilın aıtyp, sondaı-aq, órt shyǵýynyń negizgi sebepterin atady, dep jazady Egemen.kz.

Mınıstrdiń sózinshe, eldegi TJ men oqıǵalardyń basym kópshiligi – adamdardyń ómirine jáne el ekonomıkasynyń damýyna qaýip tóndiretin jáne bolyp jatqan barlyq TJ-nyń 89%-yn quraıtyn órtter.

«Qabyldanǵan sharalarǵa jáne sońǵy jyldary olardyń tómendeý úrdisine qaramastan, órtterdiń sany áli de eleýli bolyp otyr. Bıyl 8 662 órt tirkeldi, onda 335 adam zardap shekti, 280 adam qaza tapty. О́rt kezindegi ólim sebepteri - joǵary temperatýra - 83, janý ónimderiniń áserinen - 176, gaz jarylystarynan - 13, qurylys konstrýksııalarynyń qulaýynan - 3», dedi Iýrıı Ilın.

TJM basshysynyń aıtýynsha, órtterdiń kópshiligi qalalar men iri eldi mekenderde bolady. Olarǵa búginde tek 416 órt sóndirý deposy qyzmet kórsetedi, olardyń jartysy 50-70 jyldary salynǵan, 271 ǵımarat beıimdelgen, al 23-i jalǵa alynǵan ǵımarattarda ornalasqan, 20 ǵımarat avarııalyq jaǵdaıda.

«Qalalar men eldi mekenderdi tıisti órtke qarsy qorǵaýdy uıymdastyrý úshin «5 myń jáne odan da kóp halqy bar, birinshi kezektegi tártippen 127 órt sóndirý deposynyń qosymsha qurylysy talap etiledi. Sonyń ishinde 65 - qalalyq jerlerde, 62 - aýyldyq eldi mekenderde. Bıyl 2020 jylǵa qaraǵanda órtter sany 8%-ǵa azaıdy. Negizgi memlekettik órt baqylaýyna túsetin salalardaǵy, óndiristik maqsattaǵy, bilim berý jáne densaýlyq saqtaý ǵımarattary men qurylystaryndaǵy, saýda kásiporyndaryndaǵy órtterdiń sany tómendeýinen azaıdy», dep túsindirdi vedomstvo basshysy Májiliste.

Ol órttiń negizgi sebepteri qarapaıym talaptar men órt qaýipsizdigin qamtamasyz etý sharalaryn saqtamaý, aqaýly elektr aspaptaryn paıdalaný, qaýipsiz júris-turys daǵdylarynyń bolmaýy ekenin aıtty.

Sońǵy jańalyqtar

Uqsas jańalyqtar