Oblystyq isker áıelder qaýymdastyǵynyń tóraıymy Gúlsara Jamanqulovanyń aıtýynsha, Táýelsizdik jyldary Qostanaı óńirinde bıznes salasynda iri tabysqa jetken nemese iri kompanııalarǵa basshylyq etip júrgen, sondaı-aq memlekettik qurylymdardaǵy jaýapty oryndarda basshylyq qyzmet atqaryp júrgen isker áıelderdiń birneshe býyn shoǵyry qalyptasqan.
– Táýelsiz Qazaqstannyń áıelderi degen uǵymǵa búginde asyl jar, ardaqty ana, tabysty kásipker, qoǵam belsendisi, bir sózben aıtqanda, syrtta eńbek pen jetistiktiń, úıde jylý men súıispenshiliktiń, tárbıeniń uıytqysy bolyp júrgen arýlardyń bári kiredi. Elimiz táýelsizdik alǵannan keıin áıelderdiń qoǵamdaǵy orny ósip, barlyq salada joǵary tabystarǵa qol jetkizip jatqanyn kórip otyrmyz. Máselen, oblysymyzdaǵy isker áıelder qaýymdastyǵynda 68 áıel bar. Olardyń bári de jany názik bolǵanymen, ózderin ár salada moıyndatqan myqty áıelder, – dedi G.Jamanqulova.
Basqosý minberine shyqqandar agroónerkásip kesheni, sıfrlandyrý, shaǵyn bıznes salasyndaǵy búginde tolǵaýy jetken ózekti máselelerdi kóterdi. Máselen, Qostanaı qalalyq kóshbasshy áıelder klýbynyń tóraıymy Gúlvıra Qudaıqulova bıznestiń birqatar salasy, sonyń ishinde ásirese qoǵamdyq tamaqtandyrý oryndary búginde kadr tapshylyǵyn qatty sezinip otyrǵanyn jáne pandemııa bul máseleni odan saıyn ýshyqtyryp jibergenin aıtty. Al «Sarybaı» kompanııalar tobynyń basshysy Svetlana Mıhaılenko óńirdiń agroónerkásip keshenin damytýǵa eleýli úles qosyp júrgen áıelderdi úlgi ete sóıledi.
Dóńgelek ústel otyrysyna qatysýshylar jıyn aıaqtalǵan soń, oblystyq fılarmonııanyń zalynda ashylǵan «Áıelder. Bıznes. Taǵdyrlar» atty fotokórmeni tamashalady.
Qostanaı oblysy
