Otyrys barysynda «Baıqońyr» keshenin birlesip paıdalaný perspektıvalary men odan ári damytýǵa qatysty Qazaqstan-Reseı yntymaqtastyǵynyń ózekti baǵyttary talqylandy, sondaı-aq Baıqońyr qalasynyń áleýmettik salasy men qyzmet kórsetetin ınfraqurylymy obektilerin qurý týraly ýaǵdalasty.
«Úkimetaralyq komıssııa músheleri «Báıterek» ǵarysh zymyran keshenin qurý jobasyna erekshe nazar aýdardy, is-sharalar tizbesi men iske asyrý merzimderi aıqyndaldy. Sondaı-aq, keshen múlkin utymdy paıdalaný, ınfraqurylymdy, áleýmettik salany jańǵyrtý mindetteri qaraldy», dep jazady Qazaqstan úkimetiniń baspasóz qyzmeti.
Otyrysqa qatysýshylar óńirdiń jáne ǵarysh aılaǵynyń ekologııalyq qaýipsizdigin arttyrýdyń mańyzdylyǵyna, keshenniń paıdalanylmaıtyn obektilerin jalǵa berýden shyǵarý, esepten shyǵarý jáne kádege jaratý máselelerine jeke toqtaldy.
Kún tártibiniń tarmaqtary boıynsha sarapshylar ózara qolaıly sheshimder tapty, bul ÚAK otyrysynyń hattamasynda kórsetilgen.
«Báıterek» ǴZK - «Baıqońyr» ǵarysh aılaǵy bazasynda jańa ushyrý alańyn qurý jónindegi birlesken joba. Qazaqstan salyp jatqan «Báıterekte» 2023 jylǵa qaraı Reseı ázirlep jatqan «Soıýz-5» tıpti zymyrandardy ushyrýdy bastaý josparlanyp otyr.
Kezekte-tasymaldaǵysh zymyrandardan bólinetin bólikterdiń qulaý aýdany retinde Qazaqstan Respýblıkasynyń aýmaǵyndaǵy jer ýchaskesin berý jáne paıdalaný sharttary týraly kelisimdi ratıfıkasııalaý.
Baıqońyr ǵarysh aılaǵynda bar bolǵany 3 ushyrý kesheni qaldy, 25 jyl buryn olardyń sany 18-ge jetti. Jańa joba ǵarysh aılaǵyn jandandyrýy tıis.
