Sýretti túsirgen Erlan OMAR, «EQ»
Elorda tórinde elimizdiń rýhanı qundylyqtary qashan da aldyńǵy orynǵa qoıylyp keledi. Elbasynyń eń uly týyndysy sanalatyn shalqar shaharda halqymyzdyń asyl qasıetteri asqaqtap tur. Osylaısha búgingi elordada ajary men kelisti kelbetin saqtaı otyryp, ulttyq uly rýhyna da mańyzdy mán beriledi. Qalany «Nur-Sultan – jaıly qala» master-josparyna sáıkes damytýdamyz. Osy jyly 200-ge jýyq aýla men qoǵamdyq keńistikti abattandyrdyq. Densaýlyqqa paıdasy bar taza aýada jaıly ýaqyt ótkizýge arnalǵan jańa oryndar ashyldy. Atap aıtqanda, NS street life kóshe sportynyń kolızeıi, qaladaǵy alǵashqy «Teatralnyı» jaıaý júrginshiler jelekjoly, Demalys Promenade jaıaý júrginshiler kóshesi, qutqarýshylar, muǵalimder jáne taǵy basqalardyń qurmetine arnalǵan taqyryptyq alańqaılar. Abattandyrý kezinde qalany kógaldandyrýǵa nazar aýdaramyz. Bıyl 1 mln-nan astam jasyl jelek otyrǵyzamyz, teatrlar men kórikti jerlerde ózindik «jasyl araldar» paıda boldy», deıdi Nur-Sultan qalasynyń ákimi Altaı Kólginov.
Jýyrda elorda tórinde «Rýhanı jańǵyrý» qazaqstandyq qoǵamdyq damý ınstıtýtynyń uıymdastyrýymen ótken ınfografıka túrindegi «Qajyrly eńbek – tabys kilti» atty elektrondy flaerlerin ázirleý jobasynyń Nur-Sultan qalasy boıynsha jeńimpazdary marapattaldy. Ulttyq tárbıe ıdeologııalyq platformasy aıasynda ınstıtýt júzege asyryp otyrǵan joba bar kúsh-jigerin bosqa sarp etpeı, ómirde kezdesken túrli qıyndyqtarǵa moıymaı, qoǵamǵa paıdasyn tıgizgen tulǵalarǵa arnaldy. Sol arqyly jastardy eńbeksúıgishtikke baýlyp, eńbek adamyn qurmetteýge, úlgi tutýǵa shaqyrdy.
Bıyl tamyz aıynda bastaý alǵan jobaǵa bilim berý, ǵylym, medısına, mádenıet, aýyl sharýashylyǵy jáne ónerkásip sııaqty 6 sala boıynsha azamattar qatysty. Olar ózderiniń kásibı biliktiligimen jetistikke jetken ómirbaıany, qyzmeti jáne jetistiktikteri týraly aqparattardy áleýmettik jelide jarııalady. Jarııalanǵan 654 posttyń 282-si aqparattyq bolsa, 372-sin elimizdiń óńirlerindegi tulǵalardyń ózderi usyndy. Atalǵan jobaǵa Nur-Sultan qalasynan 10-ǵa jýyq adam qatysty. Solardyń arasynan QazKSR Eńbek sińirgen ártisi, ónertaný kandıdaty, ónertaný professory, Qazaq ulttyq horeografııa akademııasynyń horeografııa fakýlteti rejıssýra kafedrasynyń professory Toıǵan Izim men aýylsharýashylyq ǵylymdarynyń kandıdaty, dosent, «Standarttaý jáne sertıfıkattaý» salasynyń mamany Zarıfa Qashqarova jeńimpaz atandy. Eń bastysy, Ulttyq tárbıe ıdeologııalyq platformasy jastarǵa adal eńbekpen tapqan astyń qanshalyqty dámdi, mándi bolatynyn úlgi etti deýge bolady. El ishinen iriktelgen 30 tulǵanyń esim-soıy áleýmettik jelilerde jarııalanyp, jastardyń nazaryna usynyldy. Osy joba eńbek erdi de, eldi de alǵa jeteleıtinin oıǵa saldy. Elge Elbasy baǵdarlamasynyń ıdeıalary osylaı mándi de maǵynaly mánerde túsindirildi.
