Elimizde barlyq konfessııalar teń quqyly

Syrtqy ister mınıstrliginde Qazaqstanda tirkelgen dıp­lomatııalyq korpýs pen halyqaralyq uıymdarǵa arnalǵan Qazaqstandaǵy dinı nanym-senim bostandyǵy taqyryby boıynsha brıfıng bolyp ótti. Brıfıng sheńberinde Syrtqy ister mınıstri Erlan Ydyrysov Din isteri jónindegi agenttik tóraǵasy Marat Ázilhanovpen birlesip, Qazaqstandaǵy dinı ahýal, onyń elimiz qabyldaǵan adam quqy men demokratııa salasyndaǵy halyqaralyq mindettemelerge sáıkestigi týraly áńgimelep berdi. Brıfıngke Qazaqstannyń dinı nanym-senim bostandyǵy máselelerine mamandanǵan aza­mat­tyq qoǵam ókilderi men Qazaq­standaǵy dinı kóshbasshylar qatysty. E.Ydyrysov Qazaqstanda túrli dinı nanym-senimdegi 120-dan astam ulttar men ulystardyń ókilderi beıbitshilik pen kelisimde ómir súrip jatqanyn atap ótti. Dinı nanym-senim bostandyǵyna elimizdiń Konstıtýsııasymen jáne basqa da zańnamalyq akti­le­rimen kepildik berilgen. О́mir shyndyǵy Qazaqstannyń Din týraly jańa zańy elimizdiń halyqaralyq mindettemelerine tolyqtaı sáıkes keledi jáne dinı uıymdardyń qyzmeti úshin salaýatty orta qalyptastyryp otyr. Al Qazaqstandaǵy dinı uıymdar sany búginde 3400 birlikten asady, dedi E.Ydyrysov. Sondaı-aq, ol elimizdiń kim-kim úshin de ashyq ekenin, Qazaqstanda barlyq konfessııa ókilderiniń quqy teń ekenin jáne olar ózderiniń nanym-senimderin damytý úshin teńdeı múmkindikke ıe ekenin atap ótti. Elimizde qandaı da bir dinge qatysty qysym kórsetýshilik bar degen synı málimdemelerdiń eshqandaı negizi joq. Bizge jekelegen konfessııa­lar ókilderiniń qatysýymen azdaǵan túsinispeýshilik oqıǵalary sotqa deıin jetkeni týraly aqparattar málim. Sizderdi mundaı oqıǵalar elimiz zańnamalaryn buzýmen baılanysty ekenine sendire alamyn. Kóp jaǵdaıda bular tirkeý normalaryn saqtamaýmen baılanysty máseleler bolyp tabylady. Biz túrli konfessııalar ókilderiniń kózqarastary men nanym-senim­derine qurmetpen qaraımyz, biraq  Qazaqstan zańdaryn qurmetteý jáne saqtaý kerek degen de talap qoıamyz, dep atap kórsetti Syrtqy ister mınıstri. M.Ázilhanov Qazaqstandaǵy dinı nanym-senim bostandyǵynyń jaǵdaıy týraly baıandamasyn usyndy. Baıandamanyń bas­ty maqsaty Qazaqstannyń dinı bos­tandyq máselesin talqylaý boıynsha ashyqtyǵyn aıǵaqtaý boldy. Onyń sózinde Qazaqstandaǵy dinı nanym-senim bostandyǵy sala­syndaǵy zańnamalar halyqaralyq standarttarǵa tolyq sáıkes kele­­tindigi naqty mysaldarmen dáıek­teldi. Din isteri agenttiginiń tór­aǵasy Qazaqstanda qabyldanǵan din­ týraly jańa zań dindi de­strýktıvti jáne ekstremıstik maqsattarda paıdalanyp júrgen keıbir elementterdiń qyzmetine tosqaýyl qoıýǵa negizdelgendigimen túsindirdi. Barlyq dinı birlestikter zań aldynda teń, elimizde dinı forýmdar erkin ótkizilip júr. Mıssıonerlik uıymdardyń sany óse túsýde. Birde-bir mıssıoner qaıta tirkeý úderisinde «joq» degen jaýap alǵan joq, dedi M.Ázilhanov. Mınıstr men tóraǵa sózderine oraı Qazaqstannyń Bas ravvıni Eshaıa Kogen, Qaskeleń epıskopy Gennadıı jáne Vatıkan elshisi Mıgel Býendıa óz pikirlerin bildirdi. Olar Qazaqstan basshy­lyǵynyń osy baǵyttaǵy saıasatyn qoldaıtyndyqtaryn málimdedi. О́ıtkeni, deıdi olar, munyń barlyǵy Qazaqstan qoǵamynyń qaýipsizdigin qamtamasyz etýge baǵyttalyp otyrǵan sharalar. Din ókilderi, sondaı-aq, konfessııalardyń óz qyzmetterin júzege asyrý úshin teńdeı jáne ońtaıly jaǵdaılar jasaýǵa múmkindik berip otyrǵan din týraly jańa zańnyń der kezinde qabyldanǵanyn atap ótti. Shara sońynda qatysýshylarǵa joǵaryda atalǵan baıandama men Qazaqstanda júrgizilip otyrǵan din bostandyǵyna kepildik beretin aqparattyq materıaldar taratyp berildi. «Egemen-aqparat».