Tasymal alǵa basyp tur

«Astyq-Trans» Qazaqstan-Reseı birlesken kásiporny 2014-2015 jyldyń astyq tasymaldaý maýsymynda IT-aqparattyq qoldaý biryńǵaı portaly túrin paıdalanýdy kózdep otyr. Portalda tapsyrys avtomatty túrde beriledi. Kezeń-kezeńimen tapsyrystyń oryndalýy baqylanady. Bastysy, onda tarıf jaıy ashyq kórsetiledi. Tarıftik esep júrgizý, tarıftik kalkýlıatormen júzege asyrylady. «Bul qyzmet túri Qazaqstan naryǵyndaǵy jańa bas­tama. Tarıftiń ashyqtyǵy, vagonnyń qozǵalysyn baqylap otyrý, qujattardy barynsha azaıtý munyń barlyǵy tapsyrys berýshiniń qysqa merzimde jumysyn atqaryp bolýyna kómektesedi. Jańa astyq tasymaldaý kezeńine deıin birikken kásiporyn bul tehnologııalyq máselelerdi tolyǵymen sheshe alady», deıdi «Astyq-Trans» AQ dırektorlar keńesiniń tóraǵasy Oleg Rogachev. Byltyrǵy qyrkúıekte qurylǵaly beri BK respýblıka ishi men sheteldik baǵyttarǵa astyq ónimderin tolassyz jóneltýde. О́tken jyldyń tórtinshi toqsanynda 1,3 mıllıon tonna astyq tasymaldasa, onyń 993 myń tonnasy eksportqa shyǵarylypty. Al el aýmaǵynda 334 myń tonnasy tıisti jerge jetkizilgen. Bıylǵy jyl basynan beri bir mıllıon tonna astyq tasymaldanǵan. Bolashaqta birlesken kásiporyn vagon parkin 10 myń danaǵa jetkizýdi kózdep otyr eken. Bul vagondarmen astyq mol shyqqan jyldary 12 mıllıon tonnaǵa deıin astyq tasymaldaýǵa bolady. Aıta ketý kerek, «Rýsagrotrans» JAQ Reseıdiń Keden odaǵy elderi aıasyndaǵy Qara teńiz astyq biryńǵaı pýltiniń iri operatory bolyp tabylady. Kompanııanyń aldynda turǵan basty mindet – qarqyndy damyp kele jatqan Qazaq eliniń agrarlyq sektoryn arnaıy mamandandyrylǵan jyljymaly qurammen tolyqqandy qamtamasyz etý jáne temirjolmen astyq tasymaldaý tehnologııalaryn jetildirý. El ishinde astyq tasymaldaý soltústik óńirlerden ońtústik, batys oblystarǵa qaraı júrgiziledi. Qazaqstandyq astyq negizinen eksportqa TMD elderi men Eýroodaqqa, Taıaý Shyǵys, Ortalyq Azııa elderine jiberiledi. Kavkaz, Ázerbaıjan, Grýzııa da turaqty tutynýshysy. «Egemen-aqparat».