Sýretti túsirgen: Erlan Omar
«Prezıdentimiz aıtqandaı, ekonomıkamen qatar mádenı-gýmanıtarlyq baǵyttarǵa da úlken mán berýimiz shart. Osy baǵytta túrki ıntegrasııasyna Halyqaralyq Túrki akademııasy úlken úles qosyp otyr dep aýyz toltyryp aıta alamyz. Akademııa baýyrlas túrki halqynyń mádenı-gýmanıtarlyq baılanysyn nyǵaıtýǵa zor eńbek sińirýde. Túrkiniń tarıhyna, tiline, mádenıeti men ádebıetine qatysty irgeli zertteýler júrgize otyryp, birtutas rýhanı álemimizdi baıytý jolynda aýqymdy jumys atqaryp keledi. Solardyń biri Akademııanyń uıytqy bolýymen jaryq kórip, búgin kópshilikke tanystyrylyp otyrǵan kóne túrki tilindegi Quran kitaby», dedi Senat spıkeri.
Aıtýynsha, qasıetti Quranymyz osydan 1000 jyl buryn arab tilinen kóne túrki tiline alǵash ret aýdarylǵan eken.
«Munyń ózi sol kezdegi túrki ǵylymynyń joǵary deńgeıin kórsetedi. Túrki órkenıeti 8-9-ǵasyrlardyń ózinde ozyq dárejege kóterilgeni tarıhtan belgili. Qasıetti Quran kitabynyń sol kezdegi faksımıle nusqasynda qaıta basylýy dintanýshylar, tarıhshylar, jalpy tutas túrki jurty úshin mańyzdy oqıǵa», dedi Máýlen Áshimbaev.
