Nur-Sultanda jedel estafeta bastaldy, onda ata-anasynyń qamqorlyǵynsyz qalǵan, az qamtylǵan jáne kóp balaly otbasylardan shyqqan, erekshe bilim berý qajettilikteri bar balalarǵa, sondaı-aq daryndy, oqýda, sportta, shyǵarmashylyqta jáne qoǵamdyq ómirde jetistikke jetken balalarǵa Prezıdent atynan jańa jyldyq syılyqtar berildi.
Estafetanyń saltanatty ashylýy ertegi keıipkerleri men jańa jyl sımvoly – Barystyń sherýimen bastalyp, «Nurshashý» ansambliniń, «Amanat» balalar teatrynyń vokaldyq stýdııasynyń konserttik baǵdarlamasymen, sondaı-aq ónerpazdar lazerlik shoýdyń súıemeldeýimen jańa jyldyq bı bıledi.
Balalarǵa syılyq retinde kıim satyp alýǵa 100 myń teńgege sertıfıkat, táttiler, ústel oıyny, kitap, quttyqtaý ashyqhaty berildi.
«Men óte qýanyshtymyn. О́zim tórt balany tárbıelep otyrmyn. Bul biz úshin úlken syılyq. Balalardyń qýanyshynda shek joq. Olar Aıaz Ata men Aqshaqar kelip, balalardy quttyqtaıdy dep uzaq kútti. Osyndaı aksııalarǵa óte rızamyn, óıtkeni barlyq balalar jańa jyldyq ǵajaıypty kútýde», dedi astanalyq tórt balanyń anasy.
Is-shara sanıtarlyq normalar men karantındik shekteýlerdi qatań saqtaı otyryp ótti. Sonymen qatar, balalarǵa syılyqtar jetkizetin ekspress-estafetaǵa qatysýshylar COVID-19 vaksınasııasynyń tolyq kýrsynan ótti.
