Kollajdy jasaǵan Záýresh Smaǵul, «EQ»
О́rt shyqqan sátte úlkender óz sharýalarymen qalaǵa ketken edi. Úıde qalǵan 4 balaǵa es bolatyn ereseginiń ózi segiz jastaǵy bala. Lap etken qyzyl jalynnan qoryqqan balaqaılar syrtqa júgirip shyǵýdyń ornyna birin-biri qushaqtap úrpıisip bir buryshqa tyǵylyp qalǵan. Syrttan kómek kelmegende munyń sońy ne bolaryn oılaýdyń ózi qorqynyshty.
Abyroı bolǵanda úıdiń qabyrǵalarynan shyǵyp jatqan qoıý tútindi sol mańaıda oınap júrgen №22 mekteptiń besinshi synyp oqýshysy Oleg Pırog baıqap qalǵan. Oleg bul úıde kishkentaı balalary bar otbasy turatynyn burynnan biletin edi.
– Men kúnde ózimiz syrǵanap júrgen qar úıindisine shyǵyp shatyrdyń janyp jatqanyn kórdim. Qorshaýdyń tesiginen aýlaǵa endim. Osy sátte úıdiń ishinde qalǵan tereze áınegin taqyldatyp ura bastady. Kúrtemdi sheship, qardyń ústine tastadym. Esik arqyly kirý múmkin emes, lapyldap janyp jatyr. Odan keıin terezeni ıterip ashyp, ishke kirdim de, balalardy bir-birlep syrtqa shyǵara bastadym. Sábılerdiń bireýi jalańbut eken, oǵan shalbaryn taýyp berdim. Tórtinshi balany syrtqa shyǵaryp jatqanymda bir er adam kelip kómektesti. Ol sátte qorqynysh degen nárse oıyma da kirmepti, bar oıym balalardy syrtqa shyǵarý boldy, – dedi bala batyr.
Janyp jatqan úıdiń túbinde jartylaı qarǵa batqan gaz ballondary tur edi. Oleg álgi beıtanys er adammen birge bulardy da qaýipsiz jerge aparyp qoıady. Artynsha perishte qaǵyp ajal aranynan aman qalǵan tórt balanyń ata-anasy men órt sóndirýshiler de jetedi.
Qutqarý qyzmeti órtti jarty saǵatqa jetpeı sóndirdi. Úı ishinde qalǵan balalardyń densaýlyǵyna eshqandaı zaqym kelgen joq.
Qostanaı oblysy
