Búgin tańǵy saǵat 7:00-de Qasym-Jomart Toqaev Aqorda rezıdensııasynda Prezıdent Ákimshiliginiń, Qaýipsizdik Keńesiniń jáne kúshtik qurylymdar basshylarynyń qatysýymen keńes ótkizdi.
Jıyn barysynda elimizdegi qazirgi ahýal, sondaı-aq lańkestikke qarsy is-qımyldardyń barysy men óńirlerdegi jaǵdaı qarastyryldy.
– Antıterror operasııasy bastaldy. Kúshtik qurylymdar qaýyrt jumys atqaryp jatyr. Negizinen búkil óńirde konstıtýsııalyq tártip qalpyna keltirildi. Jergilikti organdar jaǵdaıdy baqylaýda ustap otyr. Alaıda lańkester qarý qoldanyp, azmattardyń jeke múlkine zalal keltirýde. Sondyqtan lańkestikke qarsy is-qımyldar sodyrlardy tolyq joıǵansha jalǵasa beredi, – Qasym-Jomart Toqaev.
Qurylymdyq kúshter basshylarynyń habarlaýynsha, jalpy tártipti retteýge atsalysý úshin Qazaqstanǵa UQShU-nyń birikken bitimgerlik áskerı kúshteri kele bastady. Olar strategııalyq nysandardyń qorǵalýyn qamtamasyz etý úshin belgili bir shekteýli merzimge ǵana keldi.
Jıynda Ishki ister, Qorǵanys mınıstrleriniń mindetin atqarýshy tulǵalar jáne Ulttyq qaýipsizdik komıtetiniń tóraǵasy esep berdi.
Memleket basshysy elimizdegi jaǵdaıdy odan ári turaqtandyrý jóninde birqatar nusqaý berdi.
