Memleket basshysy Qasym-Jomart Toqaev halyqqa úndeýinde UQShU-nyń birikken bitimgerlik áskerı kúshterine júgingenin aıtqan bolatyn. El Prezıdentiniń sózin UQShU jerde qaldyrǵan joq. Birikken bitimgerlik kúshter birtindep elge kele bastady. Árıne, belgili bir shekteýli merzimge. Olardyń basty maqsaty – elimizdegi strategııalyq nysandardy qorǵaý. «О́zderińizge málim, UQShU-nyń jarǵylyq qujattarynyń negizgi erejelerine sáıkes Qazaqstan Konstıtýsııalyq tártipti retke keltirýge kómek berý úshin Uıymǵa múshe memleketterdiń basshylarynan birikken bitimgerlik kúshterin engizýdi surady. Bitimgerlik kúshter elimizdegi strategııalyq nysandardyń qorǵalýyn jáne qyzmetin qamtamasyz etý úshin qysqa merzimge keldi», dedi Memleket basshysy.
El Prezıdentiniń syn saǵattaǵy syndarly saıasatyna qaramastan otandastarymyzdyń arasynda atalǵan áskerı kúshke degen senimsizdik paıda bolyp, san túrli qaýeset taraǵan edi. Dúnıe dúrligip jatqanda neniń aq, neniń qara ekenin aıyryp alý da ońaıǵa soqpasy anyq. О́tken úsh onjyldyqta lańkestik áreketpen dál bulaı betpe-bet kelip kórmegen halyqtyń úreıi ushqanyn túsinýge bolady. Soǵan qaramastan Qazaqstan qanaty qaıyrylyp, birliginen aıyrylyp, sodyrlarmen jalǵyz kúresip jatqan joq.
«Birinshiden, Qazaqstan dál osyndaı jaǵdaıda jalǵyz ózi qalǵan joq. UQShU-nyń qoldaǵany – terrorısterge tanytqan aıbary. Soǵan qaramastan, osy jaǵdaıdy paıdalanyp áńgimeni daqpyrtqa aınaldyrǵysy keletin azamattar bar. «Ol ásker el aýmaǵynda qalyp qalady, otandastarymyzǵa oq atady», degen sııaqty daýryqpa áńgime tarap júr. Taǵy da qaıtalap aıtaıyn, UQShU áskeri tek tehnıkalyq kómek kórsetedi. Iаǵnı olar elimizdegi mańyzdy strategııalyq nysandardy qorǵaýǵa, kúzetýge ǵana keldi. Esesine, bizdiń arnaıy jasaqtar eldegi lańkestermen kúreske jumyldyrylady. Sebebi kúni keshe, eń aldymen, osy strategııalyq nysandardy qorǵaýǵa májbúr bolǵan edik. Endi óz áskerimiz Almatyǵa attanyp, arnaıy operasııalar júrgizip jatyr. Iаǵnı el aýmaǵyna kirgen UQShU áskeri kóshede júrmeıdi. Otandastarymyz olardy kórmeýi de, baıqamaýy da múmkin. Eldegi jaǵdaı turaqtalǵannan keıin UQShU áskeri ushaqtaryna minip, elderine ketedi. Bul jerden geosaıası oıyn izdeýdiń qajeti joq. Muny qysyltaıań shaqta kórshi elderdiń Qazaqstanǵa kómegi dep túsingen jón. Álemde sát sanap tehnologııa túrlenip jatyr. Gıbrıdtik soǵys degen paıda boldy. UQShU-ǵa múshe keıbir memleketterdiń osy máselege qatysty tájirıbesi bar. Olardyń tájirıbesi bizge úlken kómek», dedi Májilis depýtaty Aıdos Sarym.
Bul jaǵdaı Qazaqstandy qaıtse de shyńdap, shynyqtyryp shyǵady. Qaýipsizdik qyzmetiniń tájirıbesi artady. A.Sarym aıtyp otyrǵandaı, UQShU áskerinen úreılenetin túk te joq. Tipti ol áskerdi qarapaıym halyq kórmeýi de, baıqamaýy da múmkin. Sebebi lańkestermen kúresti óz áskerimiz júrgizedi.
Muny Prezıdent Ákimshiligi Basshysynyń burynǵy birinshi orynbasary Dáýren Abaev ta aıtty. «Bul – bitimgerlik mıssııasy. UQShU áskeri áskerı qımyldarǵa qatyspaıdy. Terrorısterdi joıýmen aınalyspaıdy. 6 qańtarda qalany tazartý operasııasyn Qorǵanys mınıstrliginiń áskerı bóligi, «Arystan», «Arlan», «Búrkit» bólimsheleri atqardy. Sonymen birge uıymnyń bitimgershilik mıssııasy qorǵaý jáne kúzetý qyzmetin oryndaıdy. Operasııa nátıjesinde qaladaǵy barlyq ákimshilik ǵımarattar terrorısterden tazartyldy», dedi D.Abaev.
Beıbit kúndi ot keshken, maıdan kórgen adamnan artyq eshkim de baǵalaı almaıtyny anyq. Sondaı aǵa býyn ardagerlerimiz aramyzda bar. Sondyqtan UQShU-nyń birikken bitimgerlik áskerı kúshteriniń mańyzy týraly, eń aldymen, soǵystyń soıqanyn bastan ótkergen azamattar aıta alady. «Naýqasqa dári berseńiz – emdeledi. Dál sol sekildi, UQShU-nyń Qazaqstanǵa qol ushyn sozýy – elimizdiń eńsesin tikteıdi. Bul uıymnyń sarbazdary elimizde shaıqasqa, qaqtyǵysqa qatyspaıdy. Strategııalyq nysandardy qorǵaýǵa alady. Sondyqtan otandastarymyz Prezıdenttiń bul sheshimine túsinistikpen qaraýy tıis. Eger jaǵdaıdy ýshyqtyryp alsaq naǵyz qıyndyq sonda paıda bolady. Sondyqtan Memleket basshysynyń bul qadamyn der kezinde qabyldaǵan durys sheshim dep bilemin. Yntymaq, birlik, kelisim – eń asyl baqyt el úshin. Elimiz, egemendigimiz, tutastyǵymyz úshin Prezıdentti barynsha qoldaýymyz qajet», dedi aýǵan soǵysynyń ardageri, Májilis depýtaty Baqytbek Smaǵul.
О́zge elderdiń áskerı kúshine, sarbazdaryna júginýdiń qandaı qajeti bar degen suraýly sóılem el amandyǵyn oılaıtyn ár azamattyń kókeıinde turary anyq. Másele sol qajettiliktiń bolǵanynda bolyp otyr. Mańyzdy nysandardy qorǵaýsyz qaldyryp, terrorızmmen kúresý degenińiz bos sóz. Arnaıy jasaqtarymyz lańkesterge lap qoıǵan kezde strategııalyq nysandar dushpannyń qolyna tússe qalaı bolmaq? Sóıtip júrgende eldegi jaǵdaı da jaqsara qoımaıtyny anyq. «Odaqtastardyń qoldaýynsyz da óz áskerimizben máseleni sheshýge bolady. Biraq jaǵdaı qazirgideı 2-3 kúnde emes, odan uzaqtaý ýaqyt aralyǵynda retteler edi. Ondaıda adam shyǵyny da artady. Sosyn biz bitimgerlik kúsh quramyndaǵy mamandarmen tájirıbe almasýdamyz. Ahýal qalypqa kelgen boıda olar óz elderine qaıtady», dedi saıası sholýshy Ǵazız Ábishev.
Eń bastysy, UQShU-nyń birikken bitimgerlik áskerı kúshteri qyzmetin oryndap bolǵan soń óz memleketterine qaıtady. Oǵan orynsyz shúbá keltirip, elimizge basqynshylar kirdi dep oılaýdyń ózi ábestik. «Shetten áskerdiń kirýi eldegi turaqtylyqqa kesirin tıgizbeıdi. Ujymdyq qaýipsizdik týraly shart uıymyna múshe memleketter osyǵan deıin de mundaı jaǵdaıǵa tap bolǵan. Kezinde Qyrǵyz elinde bolǵan qyrǵyn kezinde de kórshi el basshysy osy uıymnan kómek suraǵan edi. Uıymnyń áý basta qurylýdaǵy maqsaty da osy bolatyn – qıyn kezde bir-birine qol ushyn sozý», dedi Qazaqstan Strategııalyq zertteýler ınstıtýty dırektorynyń orynbasary Sanat Kóshkimbaev.
UQShU-nyń birikken bitimgerlik áskerı kúshine júginý degenińiz – otandyq armııanyń osaldyǵyn ańǵartpaıdy. Kerisinshe, kúrdeli kezeńde judyryqtaı jumylyp, birlese áreket etýdiń biregeı úlgisi qalyptasady. Sebebi lańkestik áreketterdiń zııanyn tartyp, zardabyn shegip otyrǵan tek Qazaqstan emes. Terrorızmmen jahan jurty jaǵa jyrtysyp keledi. «Bul áskerı álsizdikti bildirip otyrǵan joq. Árbir memlekettiń óziniń ulttyq qaýipsizdigi bar. Terrorızm degen bir memlekettiń ǵana aıasynda sheshiletin dúnıe emes. Ár memleket óz saraptamalaryn jasap jatyr. Muny tek ujymdasqan, birikken kezde ǵana jeńe alamyz», dedi tehnıka ǵylymdarynyń doktory Baqtybaı Qasymbekov.
UQShU-nyń birikken bitimgerlik áskerı kúshteri qaıtken kúnde de Qazaqstan aýmaǵynda qalmaıdy. Esesine, «myń ólip, myń tirilgen» qazaq halqy bul qıyn kezeńdi de ótkerip, aıaqqa nyq turatyny anyq. Ýaqyt – emshi. Memleket basshysy halyqqa úndeýinde «Bizdiń tarıhymyzdaǵy osy bir qıyndyqty tez arada eńseretinimizge eshqandaı kúmánim joq. Eń bastysy, bolashaqta mundaı oqıǵalardyń qaıtalanýyna jol bermeý kerek», dedi. El aldynda turǵan endigi maqsat ta osy. Osyndaı orynsyz oqıǵalardyń qaıtalanýyna jol berilmeýi kerek.
