Bólingen qarajat jarty mıllıard teńgeden astam somany quraıdy.
Osyndaı qıyn shaqta Almatyny qalpyna keltirý jáne qalaǵa kórik berý úshin kórsetiletin kez kelgen kómek pen qoldaý óte mańyzdy. Árqaısymyz bir kisideı atsalyssaq, bul synaqty birge eńseremiz, ómirimizdi jaqsartamyz. Bizdiń kúshimiz birlikte.
Sber qalaǵa kómek retinde 550 mıllıon teńge bóldi. 12 qańtarda Almatyǵa sý jańa 10 reanımobıl syıǵa berildi, oryn alǵan tártipsizdikterdiń saldarynan birneshe jedel járdem kóliginiń joıylǵanyn eskersek, bul kólikter óte qajet. Zamanaýı reanımobılder barlyq qajetti medısınalyq quraldarmen jabdyqtalǵan. Atap aıtqanda, defıbrıllıatorlar, júrek qaǵysyn tekseretin tolyq júıe, pýlsoksımetrler, tasymaldaýǵa qolaıly tynys alý apparattary, ottegi ballondary. Sondaı-aq Bank Ulttyq kitaphana men Respýblıkamyzdyń memlekettik ortalyq murajaı ǵımaratyn jóndep, qalypty jaǵdaıyna keltiredi.
Almaty qalasynyń ákimi Baqytjan Saǵyntaev qalanyń birtindep burynǵy ómirine oralǵanyn jáne oryn alǵan oqıǵadan keıin qalpyna keltirý jumystarynyń júrgizilip jatqanyn aıtty.
«Biz qazaqstandyqtardyń qıyn kezeńde uıymshyldyq kórsetip, jumylǵan judyryqtaı áreket ete alatynyna taǵy da kóz jetkizdik. Almatylyqtarǵa tártipsizdik kezinde sabyrlylyq pen batyldyq tanytqandary úshin jáne bizge kórsetken kómekterińiz úshin alǵys aıtamyn», dedi B. Saǵyntaev.
Sondaı-aq qala ákimi zardap shekken salalardy qalpyna keltirýge, sonyń ishinde dansaýlyq saqtaý salasyna iri bıznes jáne qarjy ınstıtýttarynyń qoldaý kórsetip jatqanyn erekshe alǵyspen aıtty.
«Almaty qıyn kezeńdi basynan ótkizýde. Qazirgi ýaqytta basty ortaq maqsatymyz – týǵan qalamyzdyń burynǵy kelbetin qaıtarý. Biz osy bir mańyzdy iske óz úlesimizdi qosqymyz keledi. Búgin biz Almaty ákimdigine aldyńǵy qatarly medısınalyq quralmen jabdyqtalǵan 10 jedel járdem kóligin tabystaımyz. Sondaı-aq Ulttyq kitaphana men QR Ortalyq memlekettik murajaıyn óz kúshimizben qaıta qalpyna keltiremiz dep sheshtik.
Birige jumylsaq, qıraǵan nysandardy jyldam qalpyna keltirip qana qoımaı, burynǵydan da kúshtirek bolamyz degen senimdemin», dedi «Sberbank» AQ EB Basqarma tóraǵasy Eldar Teńizbaev.
Búginde Sber Banktiń bólimsheleri men bankomattary elimizdiń barlyq aımaqtarynda shtattyq tártipte jumys isteıdi. Nesıeleýdi qosqanda, klıentterge barlyq qyzmetter qoljetimdi.
