Qoǵam • 18 Qańtar, 2022

Almatydaǵy tártipsizdik: bankomattardan jarty mıllıard teńge urlanǵan

520 ret

kórsetildi

2 mın

oqý úshin

2022 jylǵy qańtardaǵy jappaı tártipsizdikter men búlik kezinde bankter men mıkroqarjy uıymdaryna keltirilgen shyǵynnyń aldyn ala somasy belgili boldy. Bul týraly Qarjy naryǵyn retteý jáne damytý agenttigi ókili aıtty, dep habarlaıdy Egemen.kz.

Gaýhar QAPASh

Almatydaǵy tártipsizdik: bankomattardan jarty mıllıard teńge urlanǵan

«Vedomstvo málimetinshe, 18 qańtardaǵy jaǵdaı boıynsha aldyn ala esep qorytyndylary ǵana belgili. Bul keıbir bankter men uıymdar tonalǵan nysandarǵa kire almaıtynyna baılanysty bolyp otyr. Onda polısııa qyzmetkerleri tergeý júrgizip jatyr.

«Búlikshiler men tonaýshylar bankterge keltirgen shyǵynnyń aldyn ala mólsheri 4,1 mıllıard teńge bolady. Bul soma zalaldyń tolyq qunyn kórsetpeıdi, óıtkeni keıbir bankter zalaldy aldyn ala baǵalaýǵa usyna almaıdy. Sebebi olar sol nysandarda júrgizilip jatqan tergeýge baılanysty keńselerge kire almaıdy», dedi agenttik ókili.

«Búlikshiler men tonaýshylar eń kóp shyǵyndy, ıaǵnı jıyntyq somanyń 99 paıyzyn Almaty bankterine keltirgen.

Keltirilgen shyǵynnyń kóp bóligi urlanǵan jáne búlingen bankomattarǵa tıesili. Olardyń quny 1,6 mıllıard teńgege baǵalanady. Sondaı-aq, 871 mıllıon teńge turatyn tehnıka joıyldy.

Budan basqa, bank keńseleri qırady, osy tarmaq boıynsha shyǵyn quny 757 mıllıon teńge bolady. Búlingen bankomattardan 507 mıllıon teńge urlanǵan», dep tolyqtyrdy agenttik ókili.

Sonymen qatar, vedomstvo ókili mıkroqarjy uıymdaryna keltirilgen zııannyń aldyn ala mólsherin usyndy.

«Ol shamamen 653 mıllıon teńge bolady. Onyń 384 mıllıon teńgesi MQU-nyń Almatydaǵy fılıaldaryna tıesili. Sondaı-aq, Almaty oblysynda 140 mıllıon teńgege jáne Qostanaı oblysynda 101 mıllıon teńgege uıym múlikteri zardap shekti», dep qorytyndylady ol.