Shaǵymdardyń deni advokattardyń qorǵalýshylaryna kirýine shekteý qoıý, ustalǵandardyń ornalasqan jeri týraly týysqandaryn habardar etpeý, ustalǵannan keıingi alǵashqy saǵattarda medısınalyq kómek kórsetpeý nemese negizsiz ustaýǵa qatysty. Adam quqyqtary jónindegi ýákil azaptaý men qatygezdikke qatysty faktilerge jol berilmeýge tıis ekenin jetkizdi. Onyń aıtýynsha, barlyq aryz ben shaǵym Bas prokýratýra men Ishki ister mınıstrligine joldanady.
«Osyǵan oraı prokýratýra qatygezdik týraly barlyq sıgnaldardy tekserip, olarǵa quqyqtyq baǵa berip, nátıjelerin jarııalaýy kerek», degen spıker adam ómiriniń eń joǵary qundylyq ekenin taǵy bir eske salyp ótti. «Bul ózgermeıtin aqıqat el Konstıtýsııasynyń negizi bolyp tabylady», dedi ol.
«Bas prokýratýranyń habarlaýynsha, Almaty qalasy prokýratýrasynyń tekserý nátıjelerin eskere otyryp, 71 azamatqa ákimshilik jaza sharalary jeńildetildi, 91 azamat bosatyldy. Bul óte mańyzdy, óıtkeni eń bastysy – halyqtyń ádilettilik pen zańdylyqqa degen senimi. Biz Ishki ister, Densaýlyq saqtaý mınıstrlikterine, Bas prokýratýraǵa barlyq qabyldanǵan shara týraly BAQ-ta tolyqqandy habarlaý týraly ótinish bildirdik. Barlyq azamattyń aqparatqa qol jetkizý quqyǵyn barynsha qamtamasyz etý óte mańyzdy. Birinshi kezekte qylmystyq nemese ákimshilik sot tóreligine ilikken adamdar týraly sóz bolyp otyr. Shetel azamattary úshin de osyndaı aqparat qajet. Sondyqtan shetel azamattaryn ustaý týraly sheteldik dıplomatııalyq ókildikterge dereý habarlaý kerek», dedi E.Ázimova.
Tártipsizdik bolǵan kúnderi aqparat júıesiniń zaqymdalýyna baılanysty, Almaty men elordada ustalǵan azamattardyń kópshiliginiń jeke basyn anyqtaýda ýaqytsha qıyndyq týyndaǵan. Sondyqtan kóbiniń týystary olardyń ustalǵany týraly aqparatty kesh aldy. Mundaı jaǵdaı medısınalyq mekemelerde de kóptep tirkelgen.
Brıfıngte E.Ázimova sondaı-aq tártipsizdikter bastalǵan alǵashqy kúnderden bastap TJ rejimi engizilgenge deıin ishki ister organdary tek ólimge ákelmeıtin qarý-jaraqtar qoldanǵanyn atap ótti. «Bul týraly IIM jáne Bas prokýratýra birneshe ret brıfıngte aıtty. Qazirgi ýaqytta tártipsizdikter kezinde ustaýǵa baılanysty azamattardyń shaǵymdaryna jedel den qoıý úshin mınıstrdiń nusqaýy boıynsha Ishki ister mınıstrligi barlyq aýmaqtyq bólimshelerinde jáne ortalyq apparatta halyqpen úzdiksiz jumys isteıtin monıtorıngtik toptar quryldy. Osyǵan oraı, IIM-niń 102 qyzmetteri men vedomstvolyq saıttarynda qaıǵyly oqıǵalardyń fotosýreti men beınematerıaldary anonımdik túrde qabyldanady», dedi spıker.
Adam quqyqtary jónindegi ýákil eldegi beıbitshilik pen tynyshtyq, tártip pen zańdylyq zań shyǵarýshy jáne atqarýshy bılikke ǵana emes, Qazaqstannyń árbir azamatyna da baılanysty ekenine basa nazar aýdardy. «Bul azamattyq jaýapkershilik. Bolǵan oqıǵa árqaısymyz úshin sabaq bolýǵa tıis», dedi ol.
«Terrorıster, tonaýshylar men beıbit mıtıngke qatysqandar anyqtalýy kerek. О́kinishke qaraı, biz ýaqytsha ustaý ızolıatorlaryna baryp, tutqyndalǵandarmen suhbattasqanda, olar óz azamattyq jaýapkershiligin tolyq sezinbegenin, Qazaqstan halqynan keshirim suraýǵa daıyn ekendikterin aıtty. Kóbi urlyq úshin ustalǵan. Osy sebepti olarǵa nazar aýdarý kerek. Bul Bas prokýratýra men jergilikti aýmaqtyq prokýratýralardyń mindeti», degen Adam quqyqtary jónindegi ýákil azamattyq qoǵam ókilderimen birge ustalǵandar ornalasqan mekemelerge barýdy jalǵastyratynyn da habarlady. Birneshe kúnniń ishinde olar 11 óńirdegi osyndaı 34 mekemede bolǵan.
