Búginde óńirdiń turaqtandyrý qorynda azyq-túliktiń 14 túri boıynsha 9,9 myń tonna aýylsharýashylyq ónimderi saqtaýly tur. Munyń syrtynda, oblys turǵyndaryn áleýmettik mańyzy bar taýarlarmen qamtamasyz etýge jaýapty «Tobyl» áleýmettik-kásipkerlik korporasııasy azyq-túliktiń 8 túri boıynsha naryqtaǵy baǵa aıyrmashylyǵyn retteýmen aınalysýda.
Atalǵan korporasııanyń málimetinshe, oblys kóleminde turaqtandyrý qoryndaǵy azyq-túlik ónimderin arzan baǵamen satatyn 200-ge jýyq saýda orny bar. Onyń 30-dan astamy – Qostanaıda. Mysaly, bul dúkenderde makaron ónimderiniń kılosy 188 teńgeden árige barmaıdy. Áleýmettik saýda sórelerinen bir kılo sıyr etin – 1 700, undy – 120, taýyq etin – 800, kúrishti – 230, sary maıdy 1 800 teńgeden satyp alýǵa bolady. Sondaı-aq suıyq maıdyń lıtri 710 teńge bolsa, jumyrtqa 39 teńgege tabylady.
О́ńirde áleýmettik mańyzy bar azyq-túlik taýarlaryna turaqty túrde monıtorıng júrgizilip, bólshek saýdadaǵy baǵanyń ósýine jol bermeý jóninde túsindirý jumystary júrgizilýde. Nátıjesinde, taýar baǵasyn negizsiz kóterip jibergen «Rauzet Saýda», «Solnechnyı», «Astyqjan Qostanaı», «Merkýrıı», «Nızkosen», «Osoba» sııaqty sýpermarketter eskertý túrindegi ákimshilik jazaǵa tartyldy.
Básekelestikti qorǵaý jáne damytý jónindegi oblys departamentiniń qyzmetkerleri OptTorg Company Plus, Solar Chickens jáne «Alta XXI vek» sııaqty kóterme saýda oryndarynda taýyq eti kem degende 15%-ǵa negizsiz qymbattaǵanyn anyqtap otyr. Atalǵan saýda oryndarynyń bárine qatań ákimshilik eskertý berildi.
Baǵany turaqtandyrýdyń eń tıimdi joldarynyń biri – jergilikti kásiporyndarda óndirilgen azyq-túlik taýarlarynyń saýda oryndaryna eshbir deldalsyz tikeleı jetýin qamtamasyz etý. Osy oraıda, oblystaǵy taýar óndirýshiler men irili-usaqty dúkenderdiń arasynda nan, suıyq maı, jumyrtqa, kartop, qant jáne kókónis taýarlaryn bólshek saýda sóresine tikeleı jetkizý jóninde 953 memorandým, 783 shart jasalǵanyn aıta ketken jón.
Qostanaı oblysy
