Aımaqtar • 21 Qańtar, 2022

Almatyda búlikten zardap shekken bızneske qandaı kómek kórsetiledi

49 ret kórsetildi

Almaty ákiminiń orynbasary Maqsat Qıqymov jappaı tártipsizdikter kezinde zardap shekken bıznes sýbektilerine qandaı qoldaý kórsetiletinin aıtty, dep habarlaıdy Egemen.kz.

Qala ákimdiginiń málimetinshe, Almatyda 1 600 bıznes sýbektisine 67,4 mıllıard teńge shyǵyn kelgen. Onyń 95,4%-i – ShOB nysandary, shyǵyn somasy – 42,9 mıllıard teńge.

Qıqymov ákimdik óz tarapynan bızneske qosymsha qarjylyq jáne qarjylyq emes qoldaý sharalaryn kórsetetinin atap ótti.

«Birinshiden, zardap shekken ShOB sýbektilerin 3 aıǵa kommýnaldyq tólemderden bosatamyz. Shyǵyndy jergilikti bıýdjet esebinen jabý týraly sheshim qabyldandy. Ekinshiden, ShOB sýbektileri 6 aı merzimge kommýnaldyq nysandar boıynsha arendadan bosatylady. Almaty qalasynyń memlekettik aktıvter basqarmasy jalǵa alýshylardyń tizimin pysyqtap, olarmen túsindirý jumysyn júrgizdi. Bul shara tek zardap shekkenderge ǵana emes, qalanyń kommýnaldyq nysandarynyń barlyq jalǵa alýshysyna qatysty», dedi Qıqymov qala ákimdiginde ótken baspasóz máslıhatynda.

Úshinshiden, sheneýniktiń aıtýynsha, zardap shekken bızneske jeńildik jasaý jónindegi jeke jalǵa berýshilermen kelissóz júrgizilip jatyr.

Sondaı-aq Halyk Bank Almatyda tártipsizdikter kezinde zardap shekken mıkro-bıznes sektorynyń qaryz alýshylaryna bıznesti qalpyna keltirýge 1 mıllıon teńge óteýsiz grant bólý týraly sheshim qabyldady. Grantty alý úshin shyǵyn mólsherin rastap qajet emes.

Budan bólek, Halyk Bank zardap shekken klıentterine 6 aıǵa deıingi merzimge nesıe tólemi boıynsha kredıttik demalys beredi.

Sondaı-aq, Halyk Bank SÝM (ortalyq ámbebap dúken), «Máskeý», «Azııa-park», «Aport», Promenade, Silk Way, «Mobılka» jáne Globus saýda ortalyqtarynda isteıtin banktiń klıenti emes mıkrobıznes ókilderine de qoldaý kórsetedi. Olarǵa kásibin qalpyna keltirýge, sonyń ishinde qajetti jabdyq satyp alýǵa 1 mıllıon teńge aýdarylady.

Buǵan qosa zardap shekken kásipkerlerge qoldaý kórsetý aıasynda «Almaty bıznes-2025» qalalyq baǵdarlamasyna ózgerister engiziledi.



 

Sońǵy jańalyqtar

Uqsas jańalyqtar