Qazaqstan • 24 Qańtar, 2022

Qor strategııasy ázirlenedi

42 ret kórsetildi

Prezıdent janyndaǵy Ortalyq kommýnıkasııalar qyzmetinde «Qazaqstan halqyna» qoǵamdyq-áleýmettik qorynyń jumysy týraly baıandaldy. Atalǵan qordy qurý týraly tapsyrmany Memleket basshysy Qasym-Jomart Toqaev bıyl qańtarda Parlament Májilisiniń otyrysynda bergen bolatyn.

Baspasóz máslıhatyna «Qazaqstan halqyna» qoǵamdyq-əleýmettik qorynyń tóraǵasy Bolat Jámishev pen qordyń qamqorshylyq keńesiniń múshesi Lázzat Shyńǵysbaeva qa­tysty. B.Jámishev qor memleket qam­ta­masyz etpeıtin baǵyttar boıynsha áleýmettik saladaǵy problemalardy sheshý úshin qurylǵanyn jetkizdi.

«Keıbir adamdar bul bıznes­ke salynǵan qosymsha salyq dep qa­byl­daıtyny týraly habarlama­lardy kórdim. Bul salyq emes, kásip­oryndardyń erikti tizimi dep aıt­qym keledi. Qazir negizinen iri bız­nes kásiporyndary men osy kásip­oryndardyń aksıonerleri aqsha aýdarýda. Salyq zańnamasyna sáıkes, salyq salynatyn tabystyń 3%-na deıin salyq shegerimderi kózdelgen jáne bul aqshanyń barlyǵy qaıyrymdylyqqa jiberiledi. Meniń oıymsha, osy salyqtyq jeńildikter aıasynda aýdarymdar júzege asyrylady. Sondyqtan bul aýdarymdar baǵanyń ósýine áser etpeıdi. Kóptegen kásipker qaıyrymdylyqpen aınalysady. Jańa qor qura otyryp, olardyń barlyq iske asyratyn jobalary qarjylandyrylady dep oılaımyn», dedi qor tóraǵasy.

Onyń aıtýynsha, bıznesmender qaıyrymdylyqqa aýdarylǵan qarajattyń jumsalýyna nemquraıdy qaramaıdy. Qordyń jaýapty jáne tıimdi jumysy ǵana qarajattyń turaqty túsýine múmkindik beredi. Sonymen qatar demeýshiler arasynan keńes qurý da josparda bar. Osy keńespen birlesip qor donorlarymen jumys isteý strategııasy ázirlenedi. Erikti qaıyrymdylyqtardan basqa qorǵa lotereıa qyzmeti operatorynan jáne mólsherlemelerdi esepteý ortalyǵynan, sondaı-aq Úkimet aıqyndaǵan basqa da kózderden qarajat túsedi.

«Búginde jeke tulǵalar erikti negizde qordy qalyptastyrýǵa qatysýda jáne qor qandaı da bir naýqan sheńberinde májbúrleý arqyly jasalyp jatyr deýge sebepterdiń bolýyna úzildi-kesildi qarsy. Biz jeke tulǵalardyń erikti túrde qatysýyn qoldaımyz. Qor halyqtyń qandaı da bir toptary memleket pen jeke bıznes usynbaıtyn qyzmetterge muqtaj bolǵan jaǵdaılarda densaýlyq saqtaý, bilim berý, áleýmettik qorǵaý, mádenıet jáne sport salasynda qaıyrymdylyq kómek kórsetedi», dedi B.Jámishev.

Sondaı-aq qor elimizdiń tutastyǵy men táýelsizdigin qorǵaý kezinde qaza tapqan áskerı qyzmetshiler men quqyq qorǵaý organdary qyzmetkerleriniń otbasylaryna qoldaý kórsetedi. Tabıǵı jáne tehnogendik sıpattaǵy apattar kezinde halyqqa memleketpen birge kómektesedi. Buǵan qosa, qor balalar úshin sport nysandarynyń jáne ózge de áleýmettik mańyzy bar qyzmetterdiń qoljetimdiligin qamtamasyz etýge qatysady.

«Jumys toby aıasynda qaıy­rymdylyq uıymdardyń ókilderimen kez­desýlerde osy máseleler talqy­landy. Kóptegen adamdar seriktesterdi tańdaýǵa óte muqııat qaraý kerek deıdi. Is júzinde tájirıbesi jáne bedeli bar seriktestermen jumys isteý kerek. Prezıdent tikeleı júgin­gen jınalysqa qatysýshylardyń qura­myna súıene otyryp, iri jáne orta kásiporyndarymyzdyń salyq salynatyn kiris kólemine qaraı, qorda 100 mlrd teńge jınalady dep oılaımyz. Eger shamamen 150 mlrd teńge qarajat tússe, osy 100 mlrd teńgege birinshi kezektegi mindetterdi jáne 50 mlrd teńgege ekinshi deńgeıdegi qosymsha mindet­terdi qurýymyz kerek. Qor qaıyrym­dylyq kómekke muqtaj jekelegen adamdarǵa ataýly, sondaı-aq júıeli deń­geıde kómek kórsetýge tıis. Muny da jolǵa qoıýymyz kerek», dedi qor basshysy.

Al qordyń qamqorshylyq keńesiniń múshesi Lázzat Shyńǵysbaevanyń aıtýynsha, ashyq túrde istelgen jumys másele týdyrmaıdy, senimge selkeý túsirmeıdi. Eń bastysy, qordyń sıfrlandyrý platformasy qarapaıym muqtaj azamattarǵa yńǵaıly bolady. Buǵan deıin kómekke muqtaj azamattar arasynda qaı qorǵa óziniń ótinishin berýi kerek, qordy qalaı tabýy kerek degen sııaqty máseleler týyndaǵan edi. Al endi ınternet, smartfon, kompıýter arqyly bárin platformada júrgizýge bolady. Bul elektrondy úkimet júıesi arqyly júzege asyrylady. Qor ótinim berýshiden túsken ótinishten onyń jaǵdaıy týraly bilip otyrady. Qarapaıym azamattar qysylǵan kezde barlyq qorǵa ótinimderin beredi.

«Halyq túsinýi kerek. Bizde qorlar kóp. Olardyń árqaısysynyń kómek kórsetý joldary da ártúrli. Jeke konsepsııasy, jarǵymen nemese basqa da qujattarmen bekitilgen baǵyt­tary bar. Sondyqtan qarbalas bolmaýy úshin ózindik yńǵaıly eko­júıe jasalady. Qaıyrymdylyq qorlary qandaı ótinish kelip túskenin kórip otyrady. Bul baǵytta kim ju­mys isteıdi, sol qor ótinimdi qabyl­­daı­dy. Qazaqstannyń qaı óńiri­­nen qan­daı ótinimder túsip jat­qa­nyn, qan­daı qorlar belsendi ju­mys is­tep jatqanyn, ótinimdi qaı qor ón­diriske alǵanyn biz de qarap otyra­myz. О́tinim boıynsha bar­lyq qujat daıyn bolǵanda qor bizge habar­lasyp, qandaı máseleler týyn­da­ǵanyn, kómekke qansha qarjy jınal­­ǵanyn aıtady. Jetpeı jatsa kó­mek­tesýimizdi surap, seriktes retin­de ótinim jasaıdy. Sonda jumys nátı­jeli bolady dep senemiz. Budan basqa, óz kómekterin kórsetip jatqan donorlar, ıaǵnı ártúrli azamattar, iri kompanııalar da bar. Olarǵa da bul platforma yńǵaıly bolady», dedi spıker.

Sondaı-aq ol ár óńirdegi mem­lekettik organdar óz baǵyttarynda jumysyn júrgizetinin, al qor olarǵa qosymsha kómek kórsetetinin atap ótti.

«Biz eshqandaı memlekettik organ­nyń, áleýmettik máselelerdi sheship júrgen qaıyrymdylyq qorlardyń, qoǵamdyq birlestikterdiń jumysyn tartyp almaımyz. Biz tek qana serik­tes retinde kómek kórsetemiz», dedi qamqorshylyq keńesiniń múshesi.

Sońǵy jańalyqtar

Dollar 10 teńgege qymbattady

Qarjy • Búgin, 16:23

Referendýmǵa latvııalyq baqylaýshylar keledi

Referendým-2022 • Búgin, 15:25

Saıajaıdan esirtki zerthanasy tabyldy

Aımaqtar • Búgin, 13:07

Uqsas jańalyqtar