Naýryzdaǵy kóshe kúnderi

О́skemende Halyq Qaharmany Qasym Qaısenovtiń atynda kóshe bar. Partızan-jazýshynyń qurmetine berilgen kóshede tól merekeni toılaý joralǵysy bastalyp ta ketti. Naýryz qarsańyndaǵy «О́nis» kúniniń aıasynda uıymdastyrylǵan bul sharaǵa kelgen qala turǵyndarynyń qarasy qalyń. Bıyl shyǵys óńirinde Ulysty jeti kún boıy jeteli jobalarmen jurt jadyna jetkizý josparlanyp otyrǵanyn buǵan deıin jazǵanbyz. Aty ańyzǵa aınalǵan, soǵys jyldary­n­daǵy erligi úshin Ýkraına halqy erekshe qadir tutatyn Qasym Qaısenov atyndaǵy kósheniń tól merekesi osylaısha bosaǵadan enip kele jatqan Naýryz merekesin bastap berdi. «Bul kóshe Qasym Qaısenovtiń qurme­tine atalǵan!» atty saltanatty sharaǵa óńir basshysy Berdibek Saparbaev ta qatysty. Oblys ákimi qarııalarmen júzdesip, olardy Naýryz merekesimen quttyqtady. Batyr bıýstine gúl shoqtaryn qoıyp, taǵzym etýden bastalǵan mereke 23 sáýirde Ulan aýdanynyń ortalyǵy – Qasym Qaısenov kentinde aıaqtalmaq. 23 sáýir – ataqty partızan-qalamgerdiń dúnıege kelgen kúni. Bir aı boıy jalǵasatyn Qasym Qaısenov aılyǵynda jastarǵa elimizdiń tarıhy men batyr babalarymyzdyń erlikterin nasıhattaımyz, dedi О́skemen qalasynyń ákimi Temirbek Qasymjanov. Sonymen birge, Qasym atanyń týysqany Baǵlan Raıymhanov, oblystyq aqsaqaldar alqasy tóraǵasynyń orynbasary Jańabaı Áshimov, qalalyq jergilikti ózin-ózi basqarý komıteti ardagerler keńesiniń tóraǵasy Igor Lıýbımov izgi tilekterin bildi­rip, alǵystaryn jetkizdi. Jambyl atyndaǵy oblystyq drama teatry men Ulan aýdandyq halyq teatrynyń shyǵarmashylyq ujymdary qaharman partızannyń ómirinen syr shertetin qoıylymdar usyndy. Jıylǵan jurtshylyq jaýyngerlik ashanadan dám tatyp, kitaphana qyzmetkerleri uıymdastyrǵan Qasym Qaısenov týraly kórmeni tamashalady jáne zııatkerlik oıyndar baıqaýyna qatysty. – Jastarymyz Qasym Qaısenovtiń shyǵarmalarymen tanys, qalamgerdiń ómir joly týraly biletinine de búgingi kórmemiz ben oıyndarymyz arqyly kóz jetkizdik, – dedi kitaphanashy Lázıpa Shaımardanova. Dýman ANASh, «Egemen Qazaqstan». О́SKEMEN.