Qoǵam • 27 Qańtar, 2022

Depýtat kedeılik pen jumyssyzdyq deńgeıin esepteý ádisin synady

66 ret kórsetildi

Senator Murat Baqtııaruly elimizdiń Premer-Mınıstriniń atyna joldaǵan depýtattyq saýalynda Qazaqstanda kedeılik pen jumyssyzdyq deńgeıin esepteý kezinde ashyqtyq pen ádildik qaǵıdattaryn engizý qajettigi týraly máseleni kóterdi, dep habarlaıdy Egemen.kz Senattyń baspasóz qyzmetine silteme jasap.

Onyń aıtýynsha, qazirgi kózqaras pen mundaı statıstıkanyń nátıjeleri senimdi emes.

«Jergilikti atqarýshy organdar, Úkimet jumyssyzdyq pen kedeıshilik deńgeıin únemi tómen kórsetýmen keledi. 2021 jyly Úkimet elde 450 myń adam jumyssyz dep kórsetse, kedeıshilik deńgeıi 4,5 % aspaıdy degen resmı aqparat berdi. Osy shyndyqqa sáıkes kele me? Kezinde Respýblıkanyń statıstıka qyzmetin basqarǵan Siz bizde statıstıkalyq málimetter oblys ákimderi men Mınıstrlikterdiń yńǵaıyna qaraı, burmalanyp berilip kelgendigin jaqsy bilesiz ǵoı dep oılaımyn. Eldegi osy kezge deıingi kedeılik deńgeıin anyqtaýda qoldanyp kele jatqan Qazaqstandyq tásil kedeılikti tómendetip kórsetip keledi. Kedeılik shegin ólsheıtin álemdik standarttarǵa shyǵýǵa bizge ne kedergi bolyp otyr? Sondyqtan da Úkimet birinshi kezekte kedeıshilikpen kúresýdiń jańa júıesin jasaý kerek. Keleshekte jalǵan statıstıkadan tolyqqandy arylý kerek», dedi senator.

Sonymen qatar memlekettik organdardyń Úkimettiń depýtattyq saýaldaryna jaýap berýge degen kózqarasyn synǵa aldy.

«Senattaǵy áriptester tarapynan qoǵamda ár túrli salaǵa qatysty depýtattyq saýaldar Úkimet basshysyna, Úkimet múshelerine joldanyp jatady. Biraq olardyń bergen jaýaptary naqty emes eki ushty bolyp keledi. Sondyqtan da depýtattyq saýaldarǵa bir japyraq qaǵazben qaıtaratyn jaýaptardy doǵarý kerek. Depýtat saýalyna jan-jaqty zerdelep jaýap berýdi jolǵa qoısańyz deımin»,  dedi ol. 

Sondaı-aq, keıde Úkimetten Parlamentke «shıki» keletin zań jobalaryn jazý salasyndaǵy problemalarǵa da toqtaldy. Sondyqtan Úkimetke zań jobalaryn memlekettik tilde ári jıi daıyndaýdy usyndy.

Sońǵy jańalyqtar

Uqsas jańalyqtar