«Bizdiń basty mindetimiz - halyqtyń barlyq deńgeıdegi sapaly bilim alýǵa qol jetkizýin qamtamasyz etý. Sonymen qatar Memleket basshysynyń bastamasymen 2022 jyl balalar jyly dep jarııalandy. Ony eleýli, damýshy jáne bilim berý is-sharalarymen aıshyqtyrý qajet. Mektepke deıingi bilim berýde sapany baǵalaý quraldaryn kúsheıtip, álemde balalardyń erte damýynyń jalpy qabyldanǵan kórsetkishterin engizý qajet», dedi Premer-Mınıstr Úkimet otyrysy barysynda.
Premer-Mınıstrdiń aıtýynsha, orta bilim berýde basty nazardy qala men aýyl arasyndaǵy oqytý sapasyn teńestirýge, oqýshylardyń fýnksıonaldyq saýattylyǵyn damytýǵa, tulǵany jan-jaqty tárbıeleýge aýdarý qajet.
«Pedagogterdi áleýmettik qoldaýdyń arnaıy baǵdarlamasy aıasynda kadr tapshylyǵy bar óńirlerge pedagogterdi tartý úshin ákimdikter men bilim mınıstrligi qosymsha aqy tóleý, turǵyn úımen qamtamasyz etý, kommýnaldyq qyzmetterge ótemaqy tóleý sharalaryn qarastyrǵany jón», dedi ol.
Álıhan Smaıylov mektepten tys uıymdardyń, tegin mektep úıirmeleriniń, sport seksııalarynyń, aýla klýbtarynyń sanyn kóbeıtý boıynsha jumys júrgizýdi tapsyrdy.
«Kásibı-tehnıkalyq bilim berý júıesin odan ári reformalaý kerek, onyń sapasyn, tásilderin jáne materıaldyq-tehnıkalyq qamtamasyz etilýin túbegeıli ózgertý kerek. Kásiporyndardyń kolledjderge qamqorlyǵyn barlyq jerde jolǵa qoıý mańyzdy. Kolledjder jastar úshin ǵana emes, jumys berýshiler, ınvestorlar úshin de tartymdy bolýy tıis. Dástúrli ǵana emes, qysqa merzimdi oqytý baǵdarlamalaryn da usynýy tıis. Biz jumysshy mamandyqtarynyń jetispeýshiligin sezinip otyrmyz. Ákimdikter bilim mınıstrligimen birlesip, memlekettik tapsyrysty qalyptastyrý kezinde muny ártúrli óńirlerdegi belgili bir jumysshy mamandyqtaryna degen qajettilikti eskere otyryp, eskerýi qajet. Eń bastysy-kolledjder men ýnıversıtetterdiń túlekteri eńbek naryǵynda suranysqa ıe bolýy kerek. Qazirgi ýaqytta eńbek naryǵyndaǵy suranys jáne onyń bolashaqqa perspektıvalyq boljamy kadrlardy daıarlaý kezinde negizgi faktor bolyp tabylady», dep atap ótti Premer-Mınıstr.
Sondaı-aq Álıhan Smaıylov Memleket basshysynyń joǵary bilim berýdi, ásirese tehnıkalyq bilimdi damytýǵa qatysty tapsyrmasy týraly eske saldy.
«Indýstrııalandyrý jáne sıfrlandyrý jaǵdaıynda birinshi kezekte zamanaýı tásilder men daǵdylary bar bilikti tehnıkalyq mamandar qajet. Joǵary bilim berý júıesin qaıta jańǵyrtý otandyq ýnıversıtetterdiń básekege qabilettiligin arttyrý, joǵary bilimdi jańa urpaqty tárbıeleý úshin qajet. Aldymyzda osy baǵyttaǵy jumysty jedeldetip, belgili ýnıversıtetterdiń fılıaldaryn, kampýstaryn ashý boıynsha naqty sharalar qabyldaý mindeti tur», dep atap ótti Premer-Mınıstr.
Jastardyń joǵary bilimge qol jetkizýin keńeıtý úshin memlekettik tapsyrys kólemin ulǵaıtyp, onyń ishinde batys óńirleriniń stýdentteri úshin tehnıkalyq mamandyqtar boıynsha qosymsha 10 myń grant bólý josparlanýda.
«Granttar arqyly joǵary bilim berý salasyndaǵy memlekettik tapsyrysty bólý kezinde Bilim mınıstrligi men ákimdikter óńirlerdiń ereksheligin jáne oblystardaǵy kadrlardyń qajettiligin eskersin. Tehnıkalyq ǵylymdardy basymdyqpen damytý, «E-lab» biryńǵaı platformasyn qurý arqyly ǵylymı ınfraqurylymdy jańǵyrtý, ǵylymdy bazalyq qarjylandyrýdy keńeıtý boıynsha sharalar keshenin kózdeý qajet», dedi Álıhan Smaıylov.
