Keneptegi keıipker – sýretshi Toqqoja Qojaǵulovtyń qyzy Tomırıs. Kartına da solaı atalady. Portret janrynda jazylǵan shyǵarma natıýrmortqa tán detaldarmen tolyqqan. Avtordyń kompozısııany túrlendirý úshin túrli amalǵa baryp, muqııat zertteý-zerdeleý júrgizgeni baıqalady. Jaryq pen kóleńkeniń ózara baılanysy da kózge ottaı basylady.
Qylqalam sheberi Tomırıs obrazynyń kópqyrly ekenin, onyń jan dúnıesi tazalyǵyn naqty ashyp kórsete alǵan. Iаǵnı keskindemeni jazý barysynda sýretshi ony jaqyn adamy retinde elestetip qana qoımaı, shyǵarmasynyń basty keıipkeri retinde de tamasha somdaıdy. Boıjetken názik saýsaqtarymen kúzgi almalarǵa qol sozyp, ózine almaqshy bolǵanyn baıqaımyz. Ústel ústinde tizbektelgen ózge de almalar bir-birimen baılanysqan tutastaı natıýrmort sııaqty, ózara ajyramaıtyn komponent qurǵan. Demek kartına janrlyq jaǵynan da ózgeshe.
Kompozısııanyń negizgi mazmuny – on jeti jasar qyzdyń ómirge degen kózqarasy jaıynda. Qyz basyndaǵy ádemi gúldermen bezendirilgen sary telpek, ıakı gúldeste onyń armanynyń asqaqtyǵynan habar berip turǵandaı. Syrt kelbetine úılesken jarasymdy kıimi, batys úlgisindegi oıý-órnekpen bezendirilgen uzyn kóılegi tula boıyna úılesip tur. Onysy arýdyń shynaıy ári móp-móldir kóńiliniń laılanbaǵanyn ańǵartady.
Kartınanyń sol jaq tómengi bóliginde bir-birimen shıelenisken tamyrlary «О́mir aǵashy» desek bolatyndaı. Bas-aıaǵy joq uzyn-sonar kúre tamyrlar sheksizdiktiń jáne jastyq shaqtyń sımvoly ispettes bir-birimen tyǵyz baılanysqan. Munda albyrt sezimniń boıaýy da bar. Arýdyń aldaǵy taǵdyrynyń san taraýly bolatynyn boljap turǵandaı. Sýretshi emosııaly sezim qubylysyn rýhanı álemine engizip, sheber shyǵarma jazǵan.
